Hun eng emaw chen sawi zawm an nih hnuah Bad Bunny leh Kendall Jenner te chu an in 'date' ngei tih a chiang ta a, an in kiss lai thlalak hmuh tur a awm ta tlat mai. March 7, Thawhlehni zan khan Sushi Park, West Hollywood, California-ah hmuh dun an ni a, an inhnimhnai lai hi paparazzi ten thla an lo la fuh a ni. 

Puerto Rican rapper Bad Bunny leh American model lar Kendall Jenner te hi thla liam tan atang khan sawi zawm an ni a, finfiahna tur erawh a awm mai lo. Restaurant pakhatah an leng dun nia sawi a awm a, hei pawh hi finfiahna a awm lo. 

Mahse zep reng theih a ni bik lo a, Mizo thufingin 'Pan lovah tho a fu ngai lo' an tih angin a tawpah chuan a rawn lang chhuak ta nge nge a ni. Bad Bunny leh Kendall Jenner te hi an chhuak dun a, an thiante pawh an tel - chung zingah chuan Kylie Jenner pawh a tel. 

Bad Bunny hi tun hnai khan Los Angeles-ah a insawn a, hei hian Kendall nena an inkarah pawh titi a titam zual hle. Thu puar paw leng satliah a ni lo tih chu a lang chho zel bawk. Bad Bunny hi jewelery designer Gabriela Berlingeri nen hun eng emaw chen an inzui a, Kendall pawh basketball star Devin Booker nen an inzui rei hman hle a nih kha - tunah erawh tudang ngai loin hmangaihna par an tlan chho rih dawn a nih hmel ta hle.  

Kum 28 mi Bad Bunny leh Kendall Jenner (27) te hi milar an ni a, an chanchin pawhin ngaihven a hlawh zui zelin a rinawm.