March 30, 2023; Mizopa ah pawh a lian pawl a ni lo, feet 5 leh inches 2 chauh a ni. Chuti chung chuan India Badminton (70+) khawvel a awp a, hneh zo an awm lo, India Champion a ni a, India aiawh turin a fehchhuak chhunzawm ang. 

March ni 26, 2023, Pathianni a khelh zawh tak, Yonex-Sunrise 45th Indian Masters (Veteran) National Badminton Championships 70+ Men's Singles category-ah kum 74 mi F. Zokima, Chaltlang Lily Veng, Aizawl chu a champion a, final-ah amah aia kum 4 a naupang, kum 70 mi, Chandran KP chu 15-21, 23-21, 21-19 in deciding game-ah hnehin, champion nomawi Mizoram tan a rawn chawi haw a ni.

He Master Championship a semifinal thleng chinte hian Jeonju, South Korea a neih tur World Senior Championship-ah India ai an awh chhunzawm ang.

ZALEN F. Zokima a biangbiakna :

Pathian a hre reng...
Final match an khelh laiin, bible chang, Sam 121:1-2 - "Tlang lamahte khian ka mit ka len chho vang: Khawi lama mi nge mi tanpuina tur lo thleng ang? Mi tanpuina tur chu LALPA Lei leh van siamtu hnena mi alo thleng ang." tih chu a rilru ah a lang tih sawiin, "Pathian engkimtithei a awm a, chakna pawh a ta a lawm ti chungin ka bei a, nuam ti takin, zangkhai takin ka khel thei a ni," a ti.

Sports lam a a sulhnu thenkhat...
F. Zokima hi Mizo zinga NIS (Punjab, Patiala) chhuak, TT Coach hmasa ber niin, kum 1981-82 session ah NIS ah coaching a zir chhuak a, chumi hma kum 1976 ah Mizoram pum huap TT inelna, Aizawl a buatsaihah a lo champion tawh. A tuina ber chu hockey niin, Mizoram tan sulhnu ropui tak tak a lo hnutchhiah tawh a, Badminton hi chu hriselna a ngaih pawimawh vanga a upat hnu lam a a khelh chauh zawk a ni. Coach nia a sulhnu te leh sports department a a sulhnu te tarlan vek sen a ni lo ang. 

Infiamna a thlir dan...
"Infiamna hi ka naupan lai atangin ka tui a, ka bei nasa a, chak tumin ka bei nasa thin. Rilru pawh a hah duh, chak loh in kan tuar em em thin. Tun hnuah erawh chuan chak leh chak lohin min tibuai tawh lo a, infiamna te chu kan chak loh pawhin mi lawmna kan siam a, kan hneh loh te an lawm a, a lo tha khawp mai ka ti thin tawh, hahdam tak, nuam ti takin ka inkhel thin." 

Rilru puthmang dik...
"Pawimawh ber pakhat chu, thianghlim taka dikna nen a kan tihin hma pawh kan sawn. Chumi a nih loh chuan khelh dan tur angin a khelh that theih tawh thin loh. Chu chu Mizo ten inzir kan ngaihna, hma kan sawn tur ang aia hma kan sawn theih loh thin a ni."

Infiamna a Mizote dinhmun...
"Mizote kan taima tawk lo thin a, tui viau thin mah i la, sang tak kan thleng zo lo thin. Mizote chu all rounder deuh vek kan ni a, mahse sang tak thleng thei lo, eng game pawh khel thei si hi a tam zawk kan ni. A tak tak ah chuan Mizo te ang a skilful hi khawvel ah midang an awm ka hre lo, a thiam chak ber kan ni a, engkim hi kan thiam zung zung a, mahse international level standard thleng turin kan teirei peih thin lo." 

"Moral development hi a tha tawk lo thin a, kan rilru putzia hian a phak lo fo thin, kan talent neih erawh min tluk tur hnam dang an awm chuang lo. Teirei kan peih lo fo a, physically leh mentally in kan fit lo fo thin. Keimahni lam inbuatsaihna a that loh chuan a hlawhtlin theih loh."

Hnathawhna lam...
Sports department ah hna hrang hrang a thawk a, tarlan vek sen a ni lo, sulhnu tam tak hnutchhiah a nei a, Education department huaiah Physical Education Officer (PEO) in a pension a, a pension hnuah pawh medal hrang hrang a hlawh chhuak a, a la hlawh chhuak zel dawn niin a lang.

South Vanlaiphai khawchhuak, F. Zokima hi Chaltlang Lily Veng, Aizawl ah inbengbelin, an chhungkua in an khawsa mek a, a vanglai chuan high jump ah feet 5 leh inches 5 zuan khum thei niin, long jump ah pawh feet 18 a thui zuang thei, infiammi dik tak, pa tumruh leh taima, entawntlak, infiammite zahkai tlingpha a ni.