India rama badminton zirna in tha, Pullela Gopichand Badminton Academy-a awm turin Mizo naupang pahnih, Joel Lalramdinmawia leh Zoramthari te thlan thar an ni.

India rama rawlthar tha ber pawl ni mek, H. Lalthazuala leh Mizo shuttler dang pawh eng emaw zat kawltu, Hyderabad-a PGBA-a awm tur, Joel-a leh Thartei te hi tuna Pullela Gopichand Intensive Training Centre (PGITC), Aizawla badminton coaching kal mek niin, TATA Trusts (NEIDA), PGBA leh Mizoram Badminton Association (MBA) te thawh hona thar hnuaia PGBA-a full time training nei tura thlan thar hmasak ber te an ni. 

Champhai Vengthlanga cheng, Thartei hi Ralte Villa Club tana khel mek niin kum 13 mi a ni a. Tun hnaia All India Sub-junior Badminton Ranking Tournament, Bangalore-a khelh zawh takah khan Under-15 Mixed Doubles-ah semi final a thleng a, Girl’s Singles-ah pre-quarter final a thleng bawk.

Electric Veng, Champhaia mi, tuna Chhinga Venga khawsa mek, Joel-a hi kum 14 mi niin Badminton Club Republic tana khel mek a ni a, hmabak êng tak nei, player tha bik a ni. 

MBA chuan Mizo naupangten badminton game-ah hma a sawn nasain, India rama a thiam ber ber an ni chho thei chu ropui an ti tak zet tih an sawi a. “Mizoram leh India ram tihmingthatu ni zel turin duhsakna sang ber kan hlan,” an ti.