Hruaia Sailo, Adama leh Sangtei Renza te channa a nih chuan tunge en chak lo awm ang? Chu mai a la ni lo - Gospela Tlau, DJ Lalvenhimi, Jerry Elaro leh Samie Pachuau te an la awm cheu bawk. Heng mi hriat hlawh tak takte channa 'Bahhnukte' film chu October 22 zan hian Vanapa Hall-ah tlangzarh a ni dawn ta.

He film hi a taka thil thleng (true story) niin, PL Lalmuankima (Pangzawl) article 'Ka ngaihtuahna hlimna chu' tih behchhana siam a ni. Director hi Samie Pachuau niin, assistant director chu Lalbuatsaiha a ni. Cinematography hi BS Pictures a ni bawk a,  screenplay hi Hruaia Sailo a ni thung. He film hi CK Hyundai ten an sponsore a ni. 

Lemchan lamah zaimite
Mihringte hian tuina leh nuam tih zawng kan nei theuh a, chumi tihlawhtling theite chu mi vannei an ni. Mizo zaimi zingah pawh lemchan lama tui tak tak an awm nual a, film lamah pawh an hmel kan lo hmu fo tawh thin. Tun hnai kum hnih thum chhung pawhin sawi tur an awm nual a, chung zingah chuan - Andrew Laltlankima, Duhsaki, Hlimhlimi leh Bethsy Lalrinsangi te pawh a langsar zingah an tel. Anni hi Mizo film hit ber ber - Nunna Thar, Thingtlang Tlangval, Where leh film dangahte pawh an hmel kan lo hmu tawh thin a, an chang thiam viau zel bawk. 

Tun tuma film chhuak thar tur 'Bahhnukte' ah pawh hian zaithiam DJ Lalvenhimi leh Mizo Idol Jerry Lalrinawma (Jerry Elaro) te pawh kan hmu leh dawn a, enbik an hlawh a nih pawhin a mak lo ang. DJ-i hian ama pualin musical film a lo tichhuak tawh a, lemchan lamah a mikhual tawh lo. Hetih rual hian Jerry-a erawh a inlan vawi khatna tur a nih hmel a, a che vel hmuh a chakawm tawh hle. 

Kuminah mizo film chhuak thar 10 chuang zet a awm tawh a, tih chhuah mai tur eng emaw zat a la awm bawk. Mizo ten film industry-ah hma kan sawn zel a, tun hnaia film chhuakte phei chu tha tak tak vek an ni hlawm tawh a, mipui lam pawhin man chawia en kan hre lo chho mek zel hi hmasawnna ropui tak a ni. Bahnukte pawh hi mipui en theiha chhawpchhuah a ni leh dawn a, a siamtute inpekna leh senso hautak zia hre chunga man chawia lei sak ngei an phu hle a ni.