Aizawl March 24, 2023 : Parliament Budget session neih mekah vawiin khan Union Minister of Railways, Communications and Electronics & Information Technology Ashwini Vaishnaw chuan Mizoram Rajya Sabha MP K. Vanlalvena zawhna chhangin Bairabi leh Sairang inkar Rel kawng siam nan sawrkar kum thar 2023-2024 ah cheng vaibelchhe 915 ruahman belh a ni tih Parliament House a hriattir a.

Ashwini Vaishnaw chuan Bairabi - Sairang Rel kawng siam nan cheng vaibelchhe 5021.45 sanctioned a ni tawh tih sawiin cheng vaibelchhe 7000 senga he hna hi zawh theih beisei a ni a ti a. Hna zawh theih beisei hun chungchanga K. Vena zawhna chu Minister hian tun dinhmunah chuan chhan hrang hrang vangin sawi chian theih a la nih loh thu a sawi a ni.

Sihhmui atanga Mizoram chhim tawp Zorinpui thlenga Rel kawng siam tumna a awm em tih K. Vena zawhna pawh Railway Minister chuan chhangin Rel kawng siam hna chu a  tul dan azira thawh thin a ni, tiin mamawhna leh a tangkai dan tur thlir chunga siam thin a ni, a ti a. Tun dinhmunah Sihhmui - Zorinpui Rel kawng siam tumna a awm rih loh thu a sawi bawk a ni.