ZALEN, November 29, 2025: Lunglei district tlangvalten set hmasa ber an hloh hnuah Aizawl district chu 3-2-a lehthalin ball beng thiam ber nihna an la a, hmeichhe final-ah Kolasib-in Lunglei an hneh bawk.

Thawhtanni zana Lunglei Convention Centre, LMC Office-a Mizoram Volleyball Association (MVA) buatsaih D-3 Business Enterprise 21st MVA Inter District Volleyball Championship 2025 chu Zirtawpni zan khan Lungleia Chanmari YMA Hall-ah khelh zawh a ni.

Mipa final-ah a thlengtu, Lunglei district chuan inhnehtawk tak chungin 26-28, 25-21, 25-17, 24-26, 15-11 (3-2)-a Aizawl district hnehin an champion a. Best Spiker atan Malsawmdawngzela, Lunglei leh Best Setter atan Lunglei aiawha khel tho, Noel Laltlansanga thlan an ni.

Hmeichhiaah Kolasib chuan inelna thlengtu, Lunglei chu 3-1 (25-12, 18-25, 26-24, 25-15)-in an hneh ve thung a, nomawi an la a. Best Spiker atan Lalmuanpuii, Kolasib leh Best Setter atan Melody Lalrintluangi, Kolasib te thlan an ni.

Inter District Volleyball Championship 2025-ah hian MVA hnuaia first leh second division player-te bakah Pro Volleyball League-a khel thin, tun season-a inziak lut tawh lote inlanna niin mipaah district pakua leh hmeichhiaah pariat an inlan a. Group hnih ve veah inthenin an inkhelh kual hnuah a sang pahnihten semifinal an lut.

Inelna hi Lunglei District Volleyball Association-in Lungleia Chanmari YMA Hall leh Electric Veng Volleyball Court-ah thlengin Ningani semifinal khelh hnuah Zirtawpni tlaiah hmeichhe final leh zanah mipa final khelh a ni.