Thlalak kan dah hi September 24, 2017 zana Premier League-a Manchester City-in si nga faia Crystal Palace an hneh tuma Pep Guardiola-a’n ball boy kum 13 mi, Micah Hamilton a hrilh ru lai a ni a. He ball boy hian Nilaini zan khan Champions League-ah a goal hmahruai thun hmangin City hi hnehna a chanpui ta der mai.

Winger Hamilton hian City tana a inlan hmasak berah hun duhthusam tawngin Red Star Belgrade chu 3-2 in an hneh a, group stage-ah chak vekin a thiam 16 zingah an tel.

Tuna kum 20 mi ni ta, Hamilton-a hi kum kua a nih lai atangin club-ah awm tawhin Serbia-ah hian minute 19-naah Matheus Nunes-a hnen atanga ball a dawn chu tha zeta thlawh lutin goal hmahruai a thun.

2-1-a hma an hruai laiin hun tawp dawnah Hamilton hian penalty a hlawh chhuak leh bawk a, hei erawh Kalvin Phillips-a’n a chhuih lut thung.

Nilaini zana an inkhelh lai hian social media-ah Guardiola-a’n kum 13 mi lek a nih lai, ball boy a nih laia a hrilh ru lai video leh thlalak a darh nasa hle a ni.

Boss pawh a khelh danah a lawm a, “Goal tha tak a ni a, a khel tha hel bawk,” a ti.

“A khelh danah ka lawm a. Kan kiangah training-in mal leh mal insuta a theihna kan hmu tawh a. Goal tha bik a thun a, penalty a hlawh chhuak bawk,” a ti.

England tana Under 16 level-a lo inlan tawh, Hamilton-a pawh a phurh a, club tana goal thun chu nuam a tiin a hma lam zel atan pawh a phur hle tih a sawi.

“Manager-in training leh inkhelah telna remchang min siamsak ve a. Player tha ber ber kianga awm chuan hma i sawn zel ang,” a ti.

“Right wing-ah min dah a, ka la khelh ngai lohna a nih avangin thil thar a ni a. Chona angin ka ngai a, nuam ti takin ka khel a ni,” a ti a. A goal thun chu bul tanna chauh a la nih thu leh heta tanga bul tan tan tak tak a duh thu a sawi bawk.