Kum 13 liamta chhung zawng khan kum tina sem thin Ballon d'Or chawimawina dawngtu hi mi pathum chiah an la awm a, chung mite chu Lionel Messi-a'n (7), Cristiano Ronaldo (5) leh Luka Modric (1) te niin Covid-19 hri leng hnuah tum khat sem leh tawh niin Messi bawk hlan a ni. 

Tunah chuan khawvel football awp mektu Messi leh Ronaldo hi kum 30 ral kai an nih ve ve tawh vangin an football khawvel hi a rei tawh vakin a rinawm loh. Anni pahnih hun tawp lamah hian player naupang deuh zawk he chawimawina ropui dawng thei tur player ropui an awm nual. Chung player tha tak tak zingah chuan an khelhna club leh ram tana an chetthat thin dan ena Ballon d'Or award pakhat mai nilo khai haw thei tur mi 4 te chu:

4. Kevin De Bruyne - Belgium/Man City
Manchester City innghahna Kevin De Bruyne thiam zia chu tlang hriat a ni. De Bruyne zarah City hian Premier League-ah ro an rel ti ila kan sawi sual tam lovang.

Season liam ta khan De Bruyne hi a player pui ten Player of the Year-ah an thlang nghe nghe. Kum 31 mi hian season tharah captain  niin City a ho leh ngeiin a rinawm a, a club tana a chtthat dan a zirin Ballon d'Or pawh a hlatin a rinawm loh.

3. Neymar Jr. - Brazil/Paris Saint-Germain
Barcelona lamah kha chuan la cham chhunzawm se, Ballon d'Or hi a dawng tawh maithei tih ngam khawpa player thiam bik Neymar hi season liam ta khan a che ropui lutuk lo va, tunah pawh hian a club sawn tht thei reng dinhmunah a ding.

Neymar Jr. hi Ligue 1 lama Paris Saint-Germain ropui taka an awm theihna tura player thawh hlawk ber pakhat a. Khawvel-a player manto ber Neymar-a ropuina daltu lian tak pahnih Ronaldo leh Messi te tha a thum chho tan a, a tan huntha a rawn her chhuak ve hnai dawnah pawh a ngaih theih ang.

Ballon d'Or vawi khat aia tam dawng thei tura rinkai kum 30 mi Neymar hian thiamna leh theihna sang  tak a nei tih a hriat. 

2. Erling Haaland - Norway/Dortmund
Palian tlan chak leh goal thun thei em em Erling Haaland hi tunah kum 22 mi chauh ala ni a, hun tha tam tak ala neih bawk. 

Season thar atangin khawvel club tha ber pakhat Manchester City tan a khel dawn a, Champions League-a a club a champion pui thei a nih ngat chuan Ballons d'Or award dawn pawh a tan thil harsa a ni dawn lo tih a chiang.

Goal a thun theih em vanga club tam takin an rim Haaland hi City-i'n an chang ta a ni a, tun season a chet that dan a zirin Ballon d'Or dawng thut thei reng a ni tawh.

1. Kylian Mbappe - France/PSG
Beisei angin tun hnaiah chetha tawk lo mahse Kylian Mbappe thiamna hi chu sawi nep theih a ni chuang lo. A khelhna club PSG a chhuahsan dawn emaw tih hnuah a thiamna hriain club hotu ten hlawh tam tak hlawh a, khelh chhunzawm turin PSG lamah an char bet a, Messi leh Neymar te nen kan la hmuh chhunzawm zel dawn a nih hmel. 

Club tam takin an awh em em Paris Saint-Germain fachuam hi a khelhna club chet that leh that lohah a Ballon d'Or award hi a innghat thui hle thung ang.