Badminton Association of Malaysia (BAM) chuan an ram tana badminton khel duh lova professional club lama in ziak lut shuttler pahnih Lee Zii Jia leh Goh Jin Wei te chu kum hnih chhung international tournament khel theilo turin a hrem. 

    BAM deputy president Jahaberdeen Mohamed Yunoos sawi danin kum 23 mi  Zii Jia hian kum hnih chhung Badminton World Federation(BWF) tournament buatsaih zawng zawngah a inlan thei dawn lova, hei hi January ni 18 atang khan chhiar tan a ni ang.      

  BAM hian an ram national badminton team chhuahsantu Goh Jin Wei, women's singles shuttler pawh kum hnih chhung a hrem ve bawk. Nikum September thla khan Goh hian a hriselna that lohna chhuanlam a siamin sport a chawlhsan thun a puang a, mahse reilote hnuah professional club KLRC a zawm leh lawi si. Goh-i hremna bik hi nikum October atanga chhiar tan a ni thung ang. 

    A hremna tawh hi Lee hian a khing let mai thei a, a khing let lo a nih pawhin BWF danah Lee hi ram dangah kalin thla 3 atanga thla 12 a awm phawt chuan professional player angin tournament a khelh phalsak a ni ang. 

    The Star sawi danin Lee hian a training hi Dubai lamah nei se, thla 2 hnuah United Arab Emirates Badminton Federation chuan international tournament khel turin a hming an pe lut thei a ni. Ram dang tana khel tur hian a khua leh tui nihna hlih kher a ngai lova, a duh phawt chuan Malaysian flag hnuaiah pawh a khel leh thei ang.