ZALEN August 05, 2026 : Sawrkar thuchhuahin a tarlan danin, mi taima leh tumruh, thiamna leh theihna nei ten eizawnna bul an tan theih nan leh an eizawnna an tihchangtlun lehzual theih nana Bana Kaih Scheme hnuaia thlan chhuah Progress Partner te loan lak atanga a pung rulh letsak nan vawiinah khan sawrkar chuan loan pe chhuaktu bank te hnenah Rs. 96,21,210 a pechhuak a, hei hi Progress Partner te loan pung a rulhsak tum hnihna a ni.

Loan pung rulh sakna hi October 2025 leh March 2026 inkara loan punna a ni a. Bana Kaih Scheme kalpuina tura sawrkarin bank a thawhpui State Bank of India, Mizoram Rural Bank leh Mizoram Cooperative Apex Bank ahte sum hi pekchhuah a ni a. Hemi bakah hian Annual Credit Gurantee Fee Rs. 14,01,762 a pechhuak nghal bawk.

Partner bank pathumte hian Progress Partner-te bank account-ah loan punna an lo rulh tawhte hi August thla chhunga thun fel hman beisei a ni.