ZALEN October 10, 2024 : Operation Ginger 2024 thlirletna hun vawiin khan Horticulture Department chuan an hmang a, Sawhthing tam doletna kawnga hma an lakna hlawhtlinna chu district tinah chawhrualin 70.45% a nih thu tarlan a ni.

Operation Ginger 2024 hi August 16, 2024 atanga khan district tinah neih a ni a, district tinah ni 10 chhung veng leh khua 413-ah Sawhthing tam buaipui dan tur zirtirna hi Horticulture mithiam ten an kalpui a ni. Farmer 6,366 te hnenah zirtirna hi pek an ni.

Tun dinhmunah Mizoram pumah chhungkaw 24,274 te chuan Sawhthing hi an ching tih report atangin a lang a, Chhungkaw 8,486 te chuan Sawhthing tam hi an tuar tih in-report an awm a, tam enkawl dam hi 70.45% zet a tling niin report a ni rih.

Vawiin khan Horticulture Department chuan sawrkar Flagship Programme - Hand Holding (Bana Kaih) Scheme hnuaia an hmalak tawhna Operation Ginger 2004 thlirletna leh Bana kaih Scheme kalpui zel dan tur Sensitization Programme on Screening, Assessment and Selection of Progress Partner under Handholding Scheme inhrilhfiahna hun Minister Prof. Lalnilawma hovin an hmang.

He hunah hian Operation Ginger 2024 report Powerpoint presentation hmangin district officer zawng zawng ten report an pe a, an hmalakna leh an hmalana in awmzia a neih thu an sawi hlawm.