Aizawl September 13, 2024: Vawiin khan Chief Minister Lalduhoma kaihhruaiin Planning & Programme Implementation Conference Hall-ah tun thla chhunga hawn hman tura ruahman Mizoram sawrkar Flagship Programme Handholding Scheme chungchang inhrilhhriatna - Ministers leh sawm bik te pualin Mizoram State Policy Coordination Committee ten an buatsaih.

Chief Minister chuan, Bana Kaih Scheme a taka kalpui a ni thei hnai ta chu lawmawm a tih thu a sawi a. "Kumin bik hi chu Pilot phase angin kan kal phawt ang a, nakkum atang chuan lian taka kalpui kan tum ang," a ti.

Dr. KC Lalmalsawmzauva chuan Handholding Scheme atana inbuatsaih dan leh vawiina sawm bik te puala inhrilhhriatna an buatsaih chhan te a sawi ve bawk.

Lalmalsawma Pachuau, Member Secretary, MSPCC chuan scheme kalpui dan tur sawifiahna a nei a. "He scheme Apex Body chu Mizoram State Policy Coordination Committee an ni. Nodal department thlan chhuah te hmanga kalpui tur component panga neih a ni ang. Hmalakna chhawrtute hi beneficiary ti lovin progress partner tih tur an ni a, dil tur a ni. Thawhpui tur hi line department ten an thlang ang a, training leh thil tul dang apiang an tihpui ang a, hma an lakna tinah an kaihruai ang," a ti.

A kalpui dan tur kimchang te, a dil dan te, a bawhzui zel dan tur te chu hawn a nih hnuah chiang zawka tarlan tur a ni

Thlai thar lei dan tur ruahmanna inhrilhhriatna hun pawh an nei nghal a. Sawrkar chuan ruahmanna a lo siam tawh angin thlai thlan chhuah palite chu a tul ang zela support price pek ngei a ni dawm tih tarlan a ni.