DOWNLOAD OUR APP

Read latest news on your phone
play-store app-store
app-store
ad
Bangalore leh Mysore ka tlawh ve a (Bangaluru ley Mysuru...aih)
titi ZALEN
Jan 19, 2020
  • C.Lalhmachhuana
  • Mizoram sawrkar, I&PR Department leh MJA hruaitute duhsakna dawngin January ni 7-12, 2020 inkar chhung khan Bangalore & Mysore (Bengaluru & Mysuru)-a hmun pawimawh hrang hrang tlawhin Press Exposure tour-ah ka zin ve a, ka zinna atanga ka thil hmuh leh hriat, Mizoram mipuite tana tangkai tur nia ka hriat tlem kan tarlang ve ang e.
  • Press mite hi ni 9.1.2020 (Nilaini)-ah Bangalore Water Supply and Sewarage Board (BWSSB) thawktuten Bangalore khawpui tuichhia an paihna leh an hman tangkai dan te a hmunah min tlawhpui a. Bangalore khawpuia chhungkaw tin tui thli an lakkhawm dan leh an tihthianghlim dan sawifiahin heng tui an tihthianghlimte hi khawpui chhunga park leh hmun hrang hranga thlai chawm nan te, Governor chenna te, an state Legislative Assembly ‘Vidhan Soubha’-ah leh airport-ah te bakah thil dang dang sil nan an hmang tih an sawi. Tui bawlhhlawh tihthianghlim nan hian litre 1000 zelah cheng 10 atanga 12 chauh an insengso tih sawiin nitin tui litre maktaduai 4 hman theih turin an siam chhuak thin a ni. He khawpui thli lakkhawmnaah hian Bangalore-a chhungkaw tin ten Sewarage Board pipe zamsa an zawm ngei ngei a ngaih bakah thla tin pawisa an chawi bawk a, hei hian khawpui thli tihthianghlimna a senso a phuhru thei nghal bawk a ni. Mizoramah pawh ruahmanna fel zawk nen awlsam taka hetiang hmalakna hi siam theih nia an hriat thu BWSSB thawktute hian an sawi a. Tuna SIPMIU-in Aizawl khawpui chhuah lama a hmalakna nen hian a inang a ni.
  • BWSSB thawktute hian chawhnu lamah Press mite hi ni khata tui litre maktaduai 150 (150 mld) sawngbawlna hmun siam mek min tlawhpui bawk a. He project hi vaibelchhe 400 senga siam mek niin kumin chhung hian hman theiha peih hman tum a ni a, he project hian Bangalore khawpui thli 40% a sawngbawl thei dawn a ni. Press mite zawhna chhangin treatment plant a tuichhia an sawngbawl chu in atan pawh a iaiawm loh a; mahse, in atan chuan an hmang lo mai tih an sawi a. Bangalore-ah chuan ruahtui khawl (rain water harvesting) chu in tinin an tih ngei ngei ngai a nih thu an sawi bawk.
  • Ni 9.1.2020 zan hian kan thlenna hotel ah Bangalore Mizo Association te nen inkawmna hun tha tak kan nei thei a, BMA hruaitute hian Bangalore-a Mizoram House a mumal lo chu tha lo an tih thu leh chak zawkin sawrkarin hma la se an duh tih an sawi a. Bangalore-ah Mizo 1200 vel an awm nia an hriat thu sawiin mi tam tak BMA-a inziaklut duh lo an awm thin niin an sawi a. Bangalore-a lehkha zir tum leh hnathawh tumte chu an tih tur zawt chiang hmasa thin se an duh tih sawiin mi tam takin harsatna an tawk tawh a; chuvangin, zirchiang hmasa phawt lo chuan kal lo se a him ber tih an sawi. BMA hruaitute chuan harsatna avanga an tihchhuah theih loh ‘Chhinlung’ magazine chu kumin hian tihchhuah leh an tum niin an sawi bawk a, hemi zan hian hlim takin zanriah kan kilho a ni.
  • Ni 10.1.2020 (Zirtawpni) khan Mysore tlawhin Tipu Sultana nipui lai in ‘Daria Daula Bagh’ Tipu Sultan-a thlan, Ranganathittu Bird sanctuary, Mysore Palace, Mysore zoo te bakah Karnataka-in Cauvery luitui a khuapna hmunte kan tlawh a, a nuamin rualawh a na duh hle. Mysore Palace kan tlawh tum hian Mysore a Mizo zirlaiten min rawn zawngin hun rei vak lo kan inkawm thei bawk a ni.
  • Ni 11.1.2020 (Inrinni) khan United Theological College, Bangalore chu kan tlawh bawk a, UTC hi kum 1910-a din a niin UTC society in an enkawl mek a. Hmarchhak state atangin Mizoram Synod, Baptist Church of Mizoram leh Ao Baptist (Nagaland) te chu Council member an niin kum tin August thlaah an kal zel dan tur an rel thin tih an sawi a. Tun dinhmunah UTC-ah hian Mizoram atangin zirlai eng emaw zat an awm a ni.

Latest News & Chhiar Hlawh