Tunlai lengzem singer 'hot' ber tih ngam Zaii Hauchhum chu Bangalore Prime Fashin Week neih zawh takah khan a perform a, mipui lawm a hlawh hle. He fashion week hi Inrinni khan ITC Welcome, Bengaluru-ah neih a ni a, kumin hi a vawi khatna a ni nghe nghe. 

Zaii Hauchhum hian sap hla a medley a, a hnehsawh leh viau mai. Stage performance a nei tha lutuk mai hian mipui a tilawm thin a, Bangalore Prime Fashin Week-a sawm a ni pawh hi a mak lo. 

Mipuiin an la hmelhriat tak tak hma khan Zonet chuan Thazual Award-ah zai turin an sawm a, heta tang hi chuan hawilet tawh loin hmasawn zawngin a la kal zel. A hla sak a piang a hit zel ti ila kan sawi sual tam kher awm lo e. 

Mizo film lar 'Ka U Liana' OST 'Ka chelh ngam lo che' tih pawh kha ama sak hi niin, a lar vet vet hle. A hla zingah hian - Ka U Liandova, Nghilhhar Di Hmasa leh Tudang ka hmangaih tawh lo'ng tihte chu mipuiin an sakpui dual dual theih khawpa lar vek an ni. Vanlalhmangaiha nena an sak 'Hmangaihte Hmangaihna' pawhin million views a kai bawk.