ZALEN July 23, 2026 : Home Minister K.Sapdanga chuan, “Bangladesh tlangram atanga Mizorama rawn tlanchhia Zo hnahthlak leh ni kher lote hi engtia lo dawn tur nge ni ang tih ngaihtuah a ngai ta hle,” a ti.

Ningania The Zozam Times-in IPR Auditorium-a ‘Bangladesh-a tribal chim ral mekin Mizoram a nghawng theih dan leh Chittagong Accord’ tih thupui hmanga seminar an buatsaih chu khuallian niin a hmanpui.

Home minister chuan Bangladesh tlangrama Zo hnahthlak chengte chu an ram ril zawka bit taka cheng Muslim-ten an chenna hmuna chen an duh a, lut an tam a, hei vang hian himna zawngin an tlanchhe ta tih a sawi.

Hetianga nawr chhuah zingah hian Chakma leh Bru pawh an tel a, kohhranten chhandam ngai an nih ve tho hriain an lo enkawl a, tlawmngai pawl leh political party ten ram himna ngaihtuah chungin an lo dawngsawng bawk a. “Hetiang karah hian Zo hnahthlak leh ni kher lote pawh engtia lo dawnsawn tur nge tih hi ngaihtuah a ngai ta a. Sorkar pawhin ngaihtuahna sen a ngai ta a ni ang,” a ti.

Seminar buatsaih chu sorkar, hnam, kohhran leh tlawmngai pawlte tan pawha ngaihtuahna mit tikeutu a nih theih a beisei tih a sawi.

Khual zahawm, Lalmuanpuia Punte, Adviser to CM (Political) pawhin an chhehvela mite dinhmun leh Mizorama an lut chhan hriat chian chu ram dinhmun tichiangtu a nih avangin a pawimawh a, chutiang atana seminar buatsaih chu nachang hria leh lawmawm a tih thu a sawi.

The Zozam Times Editor Tuikhuahthanga kaihhruai zirhonaah hian Mizoram University-a Associate Professor Dr. Lalrinnunga Hmar-in thupui a sawi hawng a. Pachhunga University-a Associate Professor Dr. Lalthlamuana Ralte kaihhruaiin sawihona hun hman a ni.

Seminar-ah hian sawm an nih angin political party, MZP leh MSU, hnam pual zirlai leh college hrang hrang students’ union aiawh, hemi lama tui mi leh chanchinbu mite an tel a ni.