Aizawl; Kum dang nena khàikhinin kumin hian Tlabung kaltlanga Bangladesh atanga ran lâkluh zât tam lo mahse, kumin January atanga June thla thleng khan Bangladesh atangin ran 308 lâkluh a ni tawh. Tlabunga AH& Vety-a thawktute chuan ran lâkluhte hi an hriselna dinhmun lo endikin, ran hrisêl tha nia ngaih te chauh ram chhungah lâkluh thin a ni a; ran lalûttute hian an ran kaih azirin Sorkar-ah chhiah an chhûnglût thin a ni. Kumtin ran lâkluh zât chhinchhiah theih chin a tlahniam zel a; Bangladesh ram chhunga buaina chhuakin ramri bulhnai boruak a nghawng vanga inkalpawh a harsat vang te, sorkar-a inhriattir lova a rûka ran lalûttu an pun zel vang tein ran lâkluh zât hi a tlahniam zel nia ngaih a ni. Tûn kum chanve chhung hian Bangladesh atangin Ui 305 zet lâkluh ni tawhin Ran lâkluh tam ber a ni a; hei bakah hian Kel 2 leh Vawk 1 kumin chhungin lâkluh a ni tawh a, chhinchhiah loh ran thahnem tak lâkluh a awm rin a ni.