DOWNLOAD OUR APP

Read latest news on your phone
app-store

Bangladesh nena sumdawnna

Apr 24, 2022

Bangladesh nen insumdawntawnna hi dan ang taka kalpui theih anih chuan kan nitin mamawh tam zawk hi man tlawm takin kan lalut thei dawn a, he thil hi a taka a chan hun tur a nghahhlelhawm em avangin kan sawrkar pawh hian border trade hi kalpui thuai anih theih nan chak takin hma la teh se

Commerce & Industries Minister Dr. R.Lalthangliana sawmna angin Bangladesh Commerce Minister Tipu Munshi leh a thuihhruai official mi pariat te chuan ram pahnih insumdawntawnna chungchang zirchiang turin Mizoram an lo zin mek a. Nimin lamah Silsuri a Border Haat hmun tur leh Kawrpuichhuah a Integrated Check Post (ICP) hmun te an tlawh a, Mizoram Chief Minister leh mi pawimawh te nen inkawmin hun an hmang chho zel dawn a, Bangladesh Minister lo zin hian rah tha a chhuah ngei beisei ang.

Mizoram chak lakna ber chu Assam a ni a, kan thenawm Assam nen hian engemaw hlekah chuan buaina nei thei reng kan ni a. Misual tute emaw thiltih avang te, tawhsual tawh palh ah te buai thut thut nei kan nih bakah tunhnaiah phei chuan ramri boruak hian state pahnih, a bikin ramri a khawsa te inkarah boruak tang tak a siam mek a ni. Heng buaina kan tawh chang hian kan nitin mamawh chawkluhna ber kawngpui chu dan a ni thin a, harsatna nasa tak kan tawk thin a ni.

Sawrkar laipuiin khawchhak ram te nen kan insumdawntawnna mai bakah awlsam zawka India laili atanga bungrua kan lakluh theihna turin Look East Policy hmangin hma a la mek a. Mahse Myanmar buaina avang leh helho vangin duh angin thil a kalchak thei lo a, he kawngpui hi peih ni ta se chuan kan mamawh tam zawk kan chawkluhna tur a ni ngei ang. He insumdawntawnna kawng hi a la tlang lo chungin nikum lama Assam nen kan buai lai pawh khan engtin tin emaw Myanmar atangin nitin mamawh engemaw zat chu kan lalut thei a ni.

Kan thenawm Bangladesh hi sumdawnna hmunpui a ni a, hnathawktu an tam bakah hnathawk hlawh a tlawm bawk avangin khawvel pum huap company te an inbun fer fur a, thil pawh a tlawm hle a ni. Bangladesh nen insumdawntawnna hi kan kalpui theih chuan kan mamawh tam tak hi man tlawm takin kan lalut thei dawn a, a hlawkna tel tu tur chu mipui te kan ni. Kan mamawh chawkluh mai ni lovin kan ram atanga kan tharchhuah thlai leh thildang engemaw zat hi kan hralhchhuak ve thei dawn bawk a, chuvangin insumdawntawnna hi chak taka kalpui ni thei se a duhawm hle. 

Tun dinhmunah chuan kan chak lakna ber Assam hi kan tihbuai hlek chuan min hrek nghal zel emaw tih mai tur a ni a, kan huai tur ang pawhin kan huai thei lo a ni. Bangladesh nen insumdawntawnna hi dan ang taka kalpui theih anih chuan kan nitin mamawh tam zawk hi man tlawm takin kan lalut thei dawn a, he thil hi a taka a chan hun tur a nghahhlelhawm em avangin kan sawrkar pawh hian border trade hi kalpui thuai anih theih nan chak takin hma la teh se.

Share now