Aizawl: State Bank of India tiamin Nationalised Bank te chuan   service charge awmsa te chu siamthain April 1, 2017 atanga hman tan turin service charge an tipung a. Hetih lai hian Mizoram Rural Bank leh Mizoram Cooperative Apex Bank Ltd. chuan an customer te hnen atanga charge hi lak an tum ve lo. State Bank of India in a service charge a siamtharah hian dan thar siam a awm nual a. Heng service charge tharah hian account a awmzat tur bithliah thar a ni a, hmun hrang hranga cheng ten an account-a awm reng tur pawisa zat bithliah an nei theuh tawh dawn a ni. SBI atanga thudawn danin mipuite'n an account a sum an dah reng tur zat hi khawpui lian (metropolitan city) a cheng ten Rs 5000, khawpui pangngai (urban) ah Rs 3000, Semi-urban ah Rs 2000 leh thingtlang (rural) ah Rs 1000 te a ni a. Heng bituk zat ang dah lo te chu an dah tlin lohna zat - 50%, 50-75% leh 75%  azirin pawisa chawi a ngai tawh dawn a ni. Heng bakah hian bank account a sum dah luh leh lakchhuah te hi thla khatah vawi thum chin a thlawnin a tih theih ang a, vawithum chinah chuan Rs 50 chawi tel zel tawh tur a ni, ATM ah pawh a thlawna lakchhuah theih zat bithliah aia a tam chuan lak apiangin Rs 20 chawi tel zel tur niin Zalen thudawnna chuan a tarlang. Heng bakah hian service charge thar hi tam tak a awm a, SBI website bank.sbi ah en theih a ni. Zalen thudawn danin he service charge thar hi India ram hmun hrang hrangah duhlohna mipui ten an kalpui mek zel a ni. Mizoram Co-operative Apex bank hotute chuan thla khata pawisa lakchhuah leh lakluh zat bithliah awm chu an Bank chuan an hmang ve dawn lo tih Zalen an hrilh a. 'Mipuite lo lungngailo turin kan duh a ni,' an ti. Mizoram Rural Bank pawhin thla khata sum khawihchet zat bithliah awm chu an hmang ve dawnlo niin an sawi bawk a. Mi thenkhat in Rs. 10 thir (coin) an dawng duhlo pawh a awmzia an hriatloh thu sawiin Bank lam chuan an la dawng reng tih an sawi. MRB thawktute chuan saving a sum dahtute tan thla 6 chhunga vawi 75 aia tam an Bank account an khawih che anih chuan commission charge ah Rs. 10 an la thin niin an sawi a, hei hi thilthar ni lovin tunhma atanga an kalpui a ni tiin mahse hetianga khawihche erawh an awm khat hle niin an sawi bawk.