Nizan Europa League quarter-final inkhelhah Bundesliga table-a 9-na hauh phak hram, German club Eintracht Frankfurt leh La Liga club lian Barcelona te chu 1-1 in an inhnehtawk. Barca hian semi-final an lut duh a nih chuan karleh khian an mualah Eintracht Frankfurt hi an hneh ngei a ngai ang. 

Bundesliga team Oliver Glasner-a naute chuan an mualah tantu mipui 52,000 neiin an phur hle a, second half tan tirh minute 47-naa Knauff-a'n Barca lama an chhuih lut phei chu an thawm a tha hle. Mahse, an beisei leh duhthusam result erawh an hlawh chhuak zo bik lo. 

Xavi-a enkawl Barcelona hian, tun hma lama an ropuina eng emaw zat an hloh tawh tih an khel dan leh an result atangin a hriat. Chaklo thei dinhmuna an din tawh hnuah kumin kumtir lama an lak luh Ferran Torres chuan minute 65-naah an si phurh a rawn sut hlauh a, kar leh lama an muala second leg khelh turah phurna thar a pe ngeiin a rinawm.

Eintracht Frankfurt te hian an inkhelh hnuhnung game li lai an draw a, Barcelona pawh hian round hmasa lamah Napoli leh Galatasaray te chu an lo draw ve tawh bawk a, second leg lamah hian home advantage hmang tangkai thei tak maw! He inkhelh first half-ah Barca defender Gerard Pique chu thal na vangin game a khelh zawm thei lo. 

Barcelona lamin mual an sawisel

Barca player te chuan an inkhelhna mual Deutsche Bank Park chu a rualrem tawk loh vangin duh anga an khelh theih loh thu an sawi. Eric Garcia chuan,"Fans lam atanga pressure sang tak leh mual duhthusam loh dan en chuan kan result hi a chhe hran lo," a ti. Goal khungtu Ferran Torres-a pawhin,"Pitch kha duhthusam chu a ni mawlh lo a ni. Mahse, professional kan nih angin kan chak zawh loh chhuanlam atan a hman erawh ka tum lo," a ti ve bawk. Sergio Busquets pawhin sawi belhin,"A khel mual that tawk loh vang khan kan ball dawn ruala han pass leh nghal zung zung kha a harsa a ni. A mual nih phung kha kan la hrethiam chiah bawk si lo," a ti.

Line-ups
Frankfurt XI: Trapp, Hinteregger, Kostic, Sow, Borré, Kamada, K. Jakić, N'Dicka, J. Lindstrøm, Tuta, A. Knauff
Subs: Hasebe, J. Grahl, Rode, Chandler, Goncalo, Da Costa, A. Toure, A. Hrustic, S. Lammers, Barkok, Jens Petter Hauge, R. Ache

Barcelona XI: Pique, Aubameyang, Alba, Busquets, Ter Stegen, Traore, Ferran Torres, Ronald Araujo, Eric Garcia, Pedri, Gavi
Subs: Neto, Braithwaite, Lenglet, Dembele, De Jong, Arnau Tenas, Riqui Puig, Óscar Mingueza, Nico González, Álex Baldé