Barcelona chuan La Liga nomawi la tur khelh nga an la neihah point nga chiah an mamawh ta a, champion thawkin thaw tawh mah se thil mak lutuk a ni tawh lo vang.

Catalan club hian Thawhlehni zan khan Nou Camp-ah substitute Jordi Alba-a’n minute 85-a freekick a chhuih luh hmangin hun tap zawk player 10-a khel, Osasuna an hneh leh a, hma an hruaina an sawh nghet.

Table laihawla awm mek, mikhual team hian minute 26 lekah a vawi khat nana an tana inlan, Jorge Herrando chu Pedri laka a chet dan avangin hnawh chhuah a ni a, La Liga-ah an team hian tun season-ah red card an hmuh vawi sarihna a ni tawh.

A tlem zawk ni mah se Osasuna hian tlawm an tum mai lo va, hun tawp dawnah Alba lo lang ta hlauh chu an tlawmpui ta chauh a ni.

Barcelona hian Herrando chhuah hnuah inkhel an thunun hle a. Pedri, Ronald Araujo leh bench atanga lut, Ousmane Dembele te chuan an hun tha neih an hlah vek a. Raphinha pawhin free-kick atangin a chhuih lut tep a, Frenkie de Jong leh Ansu Fati te pet pawh tha hle mah se lehlam goal veng Aitor Fernandez-a hming tithatu mai a ni.

Minute 79-ah Robert Lewandowski chuan goal a thun a; mahse, offside avangin an pawmsak lo.

Barca tan hian winger kum 15 mi, tun hnaiah an club tana La Liga-a inlan thei naupang ber ni thar, Lamine Yamal chu squad-ah awm leh mah se a tlan lut ve lo thung.

Osasuna hian Inrinni zan hian Seville-ah Copa del Rey final an khel dawn a, Real Madrid an hmachhawn tur atan inkhelin an khelh hnuhnung bera inlan player pakua ngawt an hahdamtir a ni.

La Liga-ah hian Barca hian khelh 33-ah point 82 nei tawhin an hnuai chiaha awm, Real Madrid aiin point 13 zetin an sang tawh a, tuna an khelh dan en chuan khelh nga la bakah point nga hmuh hi an tan thil huphurhawm lutuk niin a lang lo va; mahse, football a ni miau va, thil thleng thei a la tam a, tunah chuan ‘teuh’ chauh a la ni a, an la champion bik lo.