Taty Castellanos-a hi i la hre ngai lo a nih pawhin thil âwm lo pawh a ni lo.

Argentine striker hi lar viau tur pawh a ni lo reng a, New York City FC player hi tun season-a La Liga-a Girona an kai tirh khan season tluana an hnena khel tura loan-a an lak luh kha a ni a, kum 24 mi a ni.

Tunah erawh chuan kum 1947 hnu lama Real Madrid lama league-a goal li thun leh thei hmasa ber a nihna pawh insawi theihna tham a ni ta a. Heng a goal-te hi Spanish giants tan La Liga nomawi chân phah theihna a nih bawk bakah Barcelona tan an khawih phaka hung hnaitu a ni ta mek bawk.

Thawhlehni zana La Liga inkhelah ‘Taty’ tia an sawi mai thin, Valentín Castellanos-a hian minute 25 chhunga an mikhual laka a goal hnih thun chu duhtawk mai lovin second half-ah goal hnih dang a thun belh a, Real tan Vinicius Junior leh Lucas Vazquez ten chhang let ve mah se mual neitu hi 4-2 in an chak.

Inhliam avanga French striker goal thun thei, Karim Benzema khelh theih lohna team tan he chak lohna hi a pawi a, nomawi inchuha Barca nen an intlansiak meknaah nghawng a nei thei dawn.

La Liga-ah hian Real hian vawi sarih khel hmabak an la neihah pahnihna an ni mek a, Catalan club an phak lohna chu point 11 lai a ni ta a. Barca hian khelh riat la nei bik a, Nilaini zan hian Rayo Vallecano an tlawh ve thung dawn a, an chak zui hlauh phei chuan an elpui club hi point 14 zetin an tlansan dawn tihna a ni a, an tan champion nomawi a hnai lehzual sauh ang.

Carlo Ancelotti-a kaihhruai Real Madrid hi La Liga nen nomawi pathum beisei mek an ni a, Copa del Rey semifinal-ah Barca hnehin final an lut tawh a, May 7-ah Osasuna nen final an khel dawn.

Uefa Champions League-ah semifinal lutin Manchester City nen an inhmachhawn dawn a, he intihsiaknaa sulhnu nei tha ber team hian champion leh ngei an tum.

La Liga-ah erawh chuan chhiarkawp danah champion theihna kawng la awm mah se a kal a khirh deuh dawn niin a lang rih mek.