Zlatan Ibrahimovic chuan Barcelona-a hun a hman lai chu a career chhunga thil hriatreng tur duhawm loh tak a nih thu a sawi chhuak. 

Swedish striker hian Inter Milan tan a zawnin league title vawi thum a chawi hnuah kum 2009 khan Nou Camp a pan a, mahse Spain-ah hian kum khat chhung chiah a cham hnuah Italy lamah a insawn lehin AC Milan a zawm.

Ibrahimovic hian Barcelona tana match 46 khelhin goal 22 a khung a, mahse Barca tana a hun hman danah a lawm a famkim loh thu leh duhthusam a nih loh thu a sawi. Kha tih hun lai khan a beidawng hle nghe nghe tih a sawi chhuak bawk.

Ibrahimovic hian Barcelona lama a lungawi lohna chhan chu khelmual chhung piah lamah an coach Pep Guardiola nen an inmil loh thu a sawi bawl. 

Kum 2017-a Sky Sports Italia-in an kawmnaah Guardiola nena an buaina a sawi chhuak a, Ibrahimovic chuan,"A awmna room-ah ka luh chuan ani chu a chhuak nghal ang. Amah hmu tura ka kal pawhin ani chu hmun dangah a kal sawn daih thin a, kan inkarah khan football piah lam thil a awm a ni tih ka hrethiam mai," a ti.