Barcelona coach Koeman an thlak ang em?

Admin - Oct 04, 2021

Thlak tur tur inrinsiakna boruak a lian tawh

Season bul an tan fuh tawk loh vangin Barca coach Dutchman Ronald Koeman chu a nghing tan a, Camp Nou boss thar tur an in rinsiak tan mek. Barcelona president Joan Laporta leh a board te pawhin Koeman hi thlak ngei an duh niin a lang a, mahse an coach Ronald Koeman hi tuin nge thlak ang tih erawh an thlang fel mai thei rih lo. 

Nilaini zana Champions League-a Benfica laka si thum faia an tlawm hnu khan Koeman-a laka an beiseina a tlahniam nasa hle tih a hriat a, mualpho puitu an coach hi theh chhuak mai an rilruk ta a ni ber. Nizana Atletico Madrid nen an inkhelh erawh Koeman hian a la enkawl rih a, an chaklo nawn a nih erawh chuan Camp Nou lama inham tan chu a huphurhawm lam tawh ang. 

Tute nge an melh:

Xavi Hernandez
    Xavi hi eng tikah emaw chuan Barcelona coach ala nih ngei ring an awm nual a, amah pawh hian ropui taka alo inlan tawhna muala kir leh chu a chak ngeiin a rinawm. Barca midfielder hlui hi tunah chuan Al-Sadd coach a ni mek a, Pep Guardiola'n Barcelona a enkawl laia team innghahna lungpui pakhat a ni. 

La Masia atanga chawr chhuak a nih vangin an chhungkaw boruak pawh a hrechiang hle dawn a, tin tunah Qatar lamah lah a che chhe lutuk lo bawk nen, duhthusamin tawnhriat lamah la nau deuh mahse, Barcelona enkawl mai thei zingah a hming hi tlar hmasa lamah a lang ve tlat. 

Roberto Martinez
    Belgium coach hi Barcelona chuan an hmu tai hlein a hriat a, Koeman thlak tura rin kai ber pakhat a ni mek. Chutih rualin, Belgium head-coach hian Barcelona lam nen engmah inbiakna an la neih rih loh thu a sawi. “Football-ah chuan naktukah eng nge thleng dawn tuman ka hre lawk thei lo," tiin FIFA ranking number 1 Belgium coach hian a sawi.
Everton coach hlui leh Barcelona inkarah hian thil eng emaw tak chu a awm ngei erawh ring an tam hle thung. Martinez-a'n attacking football a khelh pui thin dan hi chu Koeman-a game ai chuan Barcelona supporter te hian an lawm zawk ngeiin a rinawm. 

Hnam inla bing tak mai an nih vangin Catalonia Martinez pawh hi Barca coach atan chuan an iai lutuk lo tih a hriat. Nikum lam atang tawh khan Barcelona nen hian sawi zawm an lo ni tawh thin a, hlawhtling taka Guardiola'n alo enkawl tawh thin dan style anga khelh pui thei tura beisei a ni.  

Coaching line-a kum 14 chhung zet tal ve tawh Martinez hian hlawhtlinna leh hming chherna ropui tak chu ala nei hran lova, a hming kan hriatna langsar deuh chu kum 2008-a Swansea, League One lama a champion pui leh 2013-a Wigan, FA Cup a chawipui tum te kha a ni deuh mai awm e.

Andrea Pirlo
    Italy midfielder hlui Pirlo hi mimal takin Laporta hian coach atan a duh hle nia sawi a awm. Laporta hian Benfica an hneh loh tuma 3-5-2 formation an hmang kha tha a ti lo hle a, Koeman-a defensive tactic kha a duh khawp lo a ni. Kha inkhelh avang khan Juventus coach hlui Pirlo hi an hmu tai ta hle a ni. 

Marcelo Gallardo
    River Plate coach Marcelo Gallardo hi Barcelona nen sawi zawm mek a ni a, Gallardo leh Argentine club River Plate in zawmna hi kumin December thla hian a tawp tawh dawn a ni.

River Plate coach hlawhtling bera chhal ngam, Gallardo hian attacking leh game rang tak a duh vangin Barca hotute mit a la hle. Kum 45 mi hi insiamrem zung zung thiam leh harsatna sukiang thiam tak a nih vangin, Koeman-a harsatna hi a sut kian thei mai an beisei a ni mahna. Gallardo khelh dan style erawh tiki-taka nen a inpersan deuh maithei. 

Anni bakah hian Liverpool coach Jurgen Klopp-a hming pawh sawi rik a awm.

Share now