Spanish club lian Barcelona chuan season thar hmaa an team tichak thei tur right-back tha an zawng mek a, chung zinga an beisei mi pathum nia an sawi chu. 

Marca lamin an report danin an head coach Xavi Hernandez chuan 2022 nipui transfer window inhawn lai khan right-back lakluh a tumruh hle a, mahse, Catalan hian an duhthusam an tihlawhtling thei lo a, January emaw nakkum nipuiah emaw right-back thar tur player tha ve tak lak ngei an tum niin an sawi. 

La Liga team hian club legend Dani Alves-a hunlai aṭang tawh khan right-back world class tia chhiar ngam an nei tawh lo va, club ropui Barcelona te ang tan chuan mualphona a tling hial ta ve ang. Europe ram hrang hrangah pawh chutiang player chu an tam lo va, chuiang mi nia an hriat player te chu an melh uluk tawh hle a ni. An player rim tum 3 te chu:

Diogo Dalot, Manchester United

Barcelona tana right-back dinhmun luah thei tura an ngaih pakhat chu Manchester United full-back Diogo Dalot a ni.

Portuguese hi tunah hian Europe-a right-back rate sang ber pawl a ni. Dalot hi full-back chhawr kual theih tak a ni a, defense sir lehlamah pawh a awm thei a, right-winger ang pawhin a khel thei a, ball a thiam em em bawk. 

A chak a, ball a ken theih bakah a in dah free thiam em em a, a khingpui player te chu mahni inrintawkna nen a hmachhawn thin mi a ni. A defensive khel a hmuhnawm em em a ni. 

Achraf Hakimi, Paris Saint-Germain

Barcelona tena lakluh an duh em em dang pakhat chu Paris Saint-Germain defender Achraf Hakimi a ni. A ni hi tun dinhmunah Europe-a right-back ṭha ber pawl a ni mek.

Moroccan tlangval hi mi tam tak chuan a talent ropui tak hi an hmuh thiam saka, kum 23 mi lek ni mah se Europe-a club lian ṭhenkhatah a khel kual nual tawh.

Hakimi hian Real Madrid atangin senior club career a tan a, Borussia Dortmund, Inter Milan leh PSG-ah a khel tawh a ni.

A speed te, a creativity te, a dribbling leh a ball thiam te hian mi hriat a hlawh a. A khel kual nual thei bawk a, wing-back, right-back leh winger ang pawhin a chhawr theih a ni. 

Defender hian 2021-22 chhung khan PSG tan goal li a khung a, assist vawi ruk a nei bawk. Tun season-ah goal hnih a khung tawh a, assist vawi hnih a nei tawh bawk.

Joao Cancelo, Manchester City

Joao Cancelo hi tun dinhmunah Europe-a full-back ṭha pathum zinga mi a ni tiin a sawi ngam hial awm e. Tun season-ah pawh a form tha khawp mai. 

Portuguese defender hi Barcelona-in Manchester City atangin an lalut a nih chuan hmun ruak hnawhkhattu player hlu tak a ni ngeiin a rinawm. 

Juventus defender hlui pawh hi hmun hrang hranga khel kual thei player a ni a, bahlah lo takin wing-back leh full-back ah a ding kawp thei. 

Cancelo hi attack ngaina tak a ni bawk a, a chak a, a tlan chak a, ball a thim hle bawk avangin theihna sang tak a nei a ni. 

Portuguese hian tun season-ah Cityzens tan goal hnih khungin assist vawi nga a nei tawh. Kum 2021-22 season khan inelna hrang hrangah goal thum khungin assist vawi 10 a nei bawk.