Barcelona tan LaLiga nomawi a chiang ta
Barcelona chu an khawpuia an elpui, Espanyol lakah league-a a zawna vawi 26 zet tlawm lo tawhin Pathianni zanah an hneh nawn leh a, a vawi 27 nan LaLiga nomawi an la dawn tih a chiang ta.

Xavi-a leh thuihhruaite hi RCDE Stadium an pan hian an chak chuan an champion thei tih an inhre sa a, phur taka bul tanin Robert Lewandowski-a goal hnih leh Alejandro Balde-a goal hmangin chawlhlawkah si thum faiin hma an hruai hman.

Second half-ah Jules Kounde-a’n tauh luh belhin 4-0 a ni zui a. Espanyol hian Javier Puado leh Joselu hmangin si hnih sut ve mah se table mawng lamah tlak hlauvin an talbuai zui a la ngai dawn ta tho a ni.

Barcelona hian khelh li an la neihah point 85 an nei tawh a, anmahni hnaih bertu, Real Madrid aiin point 14-in an sang zawk tawh a, point 12 hmuh theihna chauh khelh hmabak a awm tawh.

Tun hi Ausgust, 2021-a club legend Lionel Messi-a’n a chhuahsan hnu leh November, 2021-a manager atana Xavi an lak hnua La Liga nomawi an lak leh hmasak berna tur a ni.

Hetih lai hian an thenawm, Espanyol erawh  season li chhunga a vawi hnih nan La Liga atangin an tla mai ang em tih turin an awm mek zel a, Blaugrana laka an tlawm hi league-a inkhel vawi 11-a vawi kua an tlawmna a ni tawh a. Inkhelh hmabak vawi li an la neihah him turin theihtawp tak meuh an chhuah a ngai dawn.

Inkhelh tawpah Barcelona player-te chu khelmualah lawma sapatal an tum viau a; mahse, mual neitu lam tantute tlan lutin an insaseng zui a ngai ta thung.

Barca hian October 16-a Real Madrid khelmuala 3-1 a an tlawm tum khan point thumin Madrid club hi an phak lo kha a ni a, a hnu lawkah Champions League atangin an tla zui a, group stage-ah vawi ruk khelhah vawi thum zet an chak lo.

Barca-a kum 17 a khelh chhunga La Liga nomawi vawi riat lai la tawh, Xavi chu ring zuiin season tluana a enkawlna hmasa berah nomawi a lakpui ta tho a ni.

Catalan giants tana he nomawi a hlut zualna chu nomawi nen ngei an captain, Sergio Busquets an thlah theih phahna tur a ni a. Captain hian kum 18 zet Nou Camp-a hun a hman chu tun season tawpah a titawp ve nghal dawn tih a puang tawh a, kum 34 mi hi league-a a champion vawi kuana a ni ta.

Barcelona hian season tharah chuan Nou Camp an chhuahsan lailawk dawn bawk a, an khelmual hi sak that a ngai dawn a ni.

2020-21 hnua nomawi liantham an lak leh hmasak ber hi fan-te chuan an khelmual chuamah ngei an lawm thei dawn a, an inkhelh tur hnuhnung pahnih hi an mualah ve ve an khel dawn a ni.