Barcelona hi European football chanchina team hlawhtling ber pawl an ni a, La Liga-ah vawi 26 an champion tawh a, Champions League-ah vawi nga an chawi tawh bawk. 

Catalan club lian hian an Clasico-a an khingpui ropui Real Madrid angin European Cup an chawi tam lo mai thei a, mahse Camp Nou kawngka hmangin khawvel inkhelh star tam tak an la lut tawh a ni.

Mahse, Barcelona hian transfer market-ah tihsual lian tham tak tak an nei a, chung zinga pathum lek kan rawn tarlang dawn a ni.

1) Phlippe Coutinho chuan 2018 khan Liverpool atangin €121m zetin a zawm
Barca-a Neymar-a hmun ruak zau tak chu Dembele-a'n a luah lum zau mawlh lo, buaina belhchhah turin Liverpool aṭangin Philippe Coutinho, €121m plus bonus-in a lei. He in leina hi tun hnai an chhiatna bul tantu a ni hial mai thei. Griezmann-a'n Messi dinhmun a luah zauh zauh ang khan Coutinho erawhin team tan pawimawhna a nei phak lo. 

Coutinho hi 2019-20 khan Bayern Munich-ah mixed loan-a a khelh hnuah Barca lamah a kir leh a, a zual zapui vailenhlo an tih ang mai a ni. Kum 2022 January thla khan Aston Villa-ah thla 6 atan loan-in a chhuak ve tak naa, a hlawh tam zawk chu Barca lamin an pek a nga a, a hnuah €121m man kha €20m-in phal takin an hralh ta ringawt a ni. 

2) Miralem Pjanic- 2020 khan Juventus aṭangin €60m in an lei
Barcelona-in Juventus hnenah €60m bakah bonus €5m a pek belh a, Kum 30 mi, midfielder hi a chet that loh vangin Catalan lamah a tla na lem lo hle. 

A nihna takah chuan Barca-in Miralem Pjanic lalutin Juventus lamah Arthur Melo an pe thung a, bonus €10m-an pek belh bawk. Hetia an tih chhan hi an sum pai vawnna lamah leiba ngah team hnih te hian trick an hai ve deuh a ni awm e. 

Juventus lam hian an tifuh zawk hret a nih hmel a, Arthur chu loan-in Liverpool-ah an la thawn liam thei a, Barca erawhin Pjanic an chhawr tangkai tehchhiam lo a niang, hun eng emaw chen an inhrawn hnuah Bosnian hian free-in Emirati club Sharjah a zawm. 

3) Antoine Griezmann - 2019 khan Atletico Madrid atangin €120m in an lei
I thiam viau a nih pawhin ke veilam hmang thiam zawk i nih a Messi-a nen team khatah in awm dun a nih chuan  ropuina chance i nei lo tluk a ni. In awih lo a nih chuan Argentina international lama a khelhpui Paulo Dybala zawt mai rawh u.

Griezmann leh Messi te hian mual chhungah hmun khat an luah fo avangin Argentine superstar dip dal lo turin Frenchman hi position dangah sawn chhuah fo thin a ni.

Kum hnih chhungin La Liga-ah goal 21 chiah a khung a, Champions League-ah vawi 4 chiah a khung bawk. Barca lamin an sum sen tam dan ngaihtuah chuan beidawngthlak a tling hial awm e. Griezmann hian La Liga emaw Champions League a chawi miah lo bawk.