Aizawl: Aizawl Municipal Corporation (AMC) chuan Aizawl khawpui chu khawlaia bawlhhlawh paih phallohna hmun ‘No littering city’-ah siam tumin hma a la mek a, hemi atana dan tul angte duangin a hmun lova bawlhhlawh paih te chu hrem tum an ni. AMC Deputy Mayor Lalringliana kaihhruaiin AMC Councillor engemaw zat leh NGO aiawh bakah helama thawk department hotute chu tunhnai khan thukhawmin hmalak dan tur an sawiho a. Anti Littering Committee hnuaiah hian AMC dan neihsa zulzuiin dan siam nise, chumi hmang chuan hmalak nise an ti. Meeting chuan bawlhhlawh paih mai mai thatlohzia te, hriselna a khawih pawi dan leh midangte tan harsatna a siam nasatzia te nasa zawka tlangaupui tha an ti a, hemi atan hian NGO te thawhpuia sawm nise an tih bakah school leh office ah te nasa zawka zirtirna kalpui nise an ti bawk.