Thawhtanni atanga Aizawl khawpui bawlhhlawh phurtu lirtheite tlan loh an tum mek laiin Aizawl Mayor Lalrinenga Sailo chuan local council (LC) tinte chu tlantir vek turin a ngen a, police pawh a tul anga duty-tir an ni dawn tih a sawi.

Zirtawpni khan Aizawl khawpui hnawm phurtu lirthei pawl, Garbage Vehicle Owners Association (GVOA) chuan an lirthei chhawr man tisang tur leh kairual zawka rate siam tura Aizawl Municipal Corporation (AMC) an phut vangin Thawhtanni atangin tlan loh an tum tih an lo puang tawh.

Hemi chungchangah mayor hian Inrinni khan Aizawla LC tinte hnenah thuchah a tichhuak.

Rinenga Sailo chuan local council tinte chu an veng theuhah bawlhhlawh khawn motor tlantir theuh turin a ngen a, “Eng emaw harsatna awm thei veng turin police duty turte pawh ruahman a ni dawn,” a ti.

Mipuite harsatna thlen thei lakah local council zawng zawngte thawhpuiah a sawm bawk.

Rinenga Sailo chuan chanchinthara bawlhhlawh phur an tlan dawn lo tih lang ta mai chu AMC-in pawi a ti tak zet tih a sawi a, GVOA-in Zirtawpnia thuthar lakhawmtute an kawmnaa an tar lan (press note) angin rate hi a khât tawk san thin a ni a, diesel man sang leh senso sang zelah ennawn leh tum mek a ni tih a tar lang.

Mayor chuan bawlhhlawh paih motor hi PPP mode-a kalpui a nih avangin mipuite pawisa thawh tur a nghawng tel dawn tih sawiin, “AMC sum dinhmun leh mipui thawh ve tur uluk taka chhut a tul a, hmanhmawh taka tih mai a harsa,” a ti.

Thawhtanni hian City Local Council Association hruaitute leh GVOA hruaitu hi inbiak leh an tum a, harsatna siam lova sawi fel theih ngei an beisei tih mayor chuan a tar lang bawk.