Aizawl: SIPMIU-in Tuirial bula bawlhhlawh sawngbawlna hmun thar a siamah kar thar atangin bawlhhlawh tawih thei chi sawngbawl tan tum a ni. SIPMIU thawktute hnen atanga Zalen thudawn danin bawlhhlawh sawngbawlna hmun thar ‘Solid Waste Resource Management Centre’-ah hian a bultan nan tun kar chho atang hian veng 2/3 a bawlhhlawh tawih theite chu la lutin leitha siamna atan sawngbawl tan tum a ni a, a tul ang zelin veng dang bawlhhlawh tawihthei pawh lakluh chhoh zel tum a ni tih an sawi. Zalen zawhna chhangin SIPMIU thawktute chuan tuna bawlhhlawh paihna atana hman mek hmunah hian Aizawl khawpui chhunga bawlhhlawh tawih thei leh tawih thei lo thliarhrang tawh veng 9-te bawlhhlawh chu an sawngbawl mek tawh tih an sawi a. Tunah hian veng 10 dangah bawlhhlawh thliar hran hna hi kalpui leh an tum mek niin an sawi bawk. SIPMIU thawktute chuan tuna bawlhhlawh tawih thei leh tawih thei lo an thliar hran mek chu a paihna hmun tharah kalpui ngei a ngaih tawh dawn avangin tun atanga mipuite thliar hrang tura an lo inzir a pawimawh thu an sawi. Zawhna chhangin SIPMIU thawktute chuan, “Bawlhhlawh atanga leitha kan siam hi kg ah Rs.15 zelin hralh kan tum,” tiin an sawi. SIPMIU thawktute chuan ruahman dan chuan Solid Waste Resource Management Centre hi kumin chhunga zawh hman tum a ni a, tun dinhmunah changpat leitha siamna tur building 4 chu sak zawh a ni tawh a, mechanical compost khawl hmanga thialna tur building 2 sak turah a pakhat zawkah a ban tung tawhin a dang sakna tur laih mek a ni a, office building tur chu 98% sak zawh a ni tawh niin an sawi.