Aizawl; Inrinni khan Aizawl Municipal Corporation chuan Aizawl Mayor Lalrinenga Sailo hoin AMC Auditorium-ah Faina Hapta 2022 kharna hun hman a ni a ni a, bawlhhlawh thliar tha leh faina kawnga hma la tha hnenah lawmman hlan a ni.

Kumin Faina hapta thupui chu ‘Bawlhhlawh thliar hran’ tih a  ni a, a hawnna hun hi October 1 khan veng tinah neih a ni a. Faina Hapta kharna hunah hian bawlhhlawh thliar hrang tha leh faina kawnga hma la tha local council-te hnenah chawimawina thuziak leh sumfai lawmman Rs.10,000 theuh hlan a ni.

Faina Hapta kharna hun hi Zothanmawia, Municipal Commissioner-in kaihruaiin Aizawl mayor chuan thu a sawi a, “Aizawl khawpui hi Zofate tana kan darthlalang a ni a; chuvangin, a chhunga chengten uluk taka kan vawn fai a tul a, kan kawtkai a fai viau lai hian a lang lo/kumkarte a fai tel a ngai a ni,” a ti a. Faina hian hriselna a ken tel avangin theihtawp chhuah a tul thu a sawi bawk.

Bawlhhlawh enkawl hi hna hniam a nih loh thu sawiin, khawvel ram changkanga kal reng renga hrilhfak chu an faina a nih zel thu a sawi a. Dan kalha leivung leh bawlhhlawh paihtute pawh inngaihnathiamna nei loa Rs. 5,000 an chawitir thin thu a tar lang a, paih ru hriate chuan a proof-na (thlalak) AMC thawktute hnenah rawn thawn thin turin a ngen.

Aizawl Mayor chuan Kristmas boruakah kawnchei tih tum a nih thu a sawi a, a cheina tur sum pawh AMC-in ruahmanna a siam dawn thu leh lawmman pawh siam a nih tur thu a puang a ni.

Aizawl khawpui mei mit loa a din champha phak lawmna hun kum tin Feb 25-ah hman a nih tur thu Lalrinenga Sailo chuan a sawi a, chumi pual chuan Aizawl khawpui faina leh mawina (Cleanliness & Beutification) kawnga hma lak a ni dawn a, veng hrang hrang ten intihsiakna neiin, nakum Feb 25 hian lawmman tha tak sem a ni dawn a ni, a ti. Aizawl khawpui a mawina turin veng tin ten pangpar/thing par chin tam a that thu sawiin, Local Council kaltlangin project siam a nih tur thu te a tarlang bawk.

Khual zahawm Laltlanzova Khiangte, Executive Coucillor (i/c Solid Waste Management) pawhin thu sawiin AMC hmalakna hrang hrangte kalkhawmte a hrilh a, hun reilo teah bawlhhawlh sawngbawlna changtlung zawk an neih theih a beisei thu te a sawi a ni.

Faina Hapta Kharna Hun-ah hian Aizawl khawpui chhunga Local Council aiawhte an kal tha hle a ni.

Bawlhhlawh thliar hrang tha LC panga te:
- Upper Republic
- Mission Veng
- Dawrpui
- College Veng
- Tuikhuahtlang

Faina hapta chhunga veng faina kawnga hmala tha LC pathum te:
- Tlangnuam
- ITI
- Chaltlang