Aizawl khawpuiah bawlhhlawh paih dan thar kalpui tan a ni a, danin a phut angin a paihna hmun thar Solid Waste Management Centre, Tuirial-ah paih vek tawh tur a ni a. Bawhlawh chu chi 4 a then niin tawih thei, tawih thei lo, plastic leh a kaihhnawihte a nih bakah electronic waste te a thliar a ni bawk a ni.

Kum 4/5 liam ta atang khan Aizawl ah bawlhhlawh sawngbawl dan mumal hi sawi lar a ni tawh a. Bawlhlawh hal hluah hluah chu boruak leh a bul vela mi cheng tan a that loh bakah dan khauh zawk in a phut chhoh zel vangin hma lak a ni zel a. A taka kan kalpui hmain bawlhhlawh bawm chi hnih sem a nih chiam tawh kha, a nihna tura hman theih a nih meuh chuan bawlhlawh bawm tibo hman tam tak an awm nghe nghe a nih kha. A hnuah Aizawl a veng thenkhat chu thlang chhuakin bawlhhlawh thliar tir an ni a, veng thenkhat chuan ngaiah an neih tan tawh laiin thenkhatin an la thliar ve loh avangin a paihna hmunpuiah a hrana thliar leh tho a ngai a, sawisel a hlawh viau a nih kha. Thil liantham tih dawn chuan ruahmanna mumal tak nen kalpui a ngai a ni.

Vanduaithlak takin hripuiin min han nuai tak avangin duh angin thliar hleih theih a ni ta lo a, hun engngemaw chen chu mumal lo taka kalpui a nih hnuin November atang hian kalphung thar duan chu hman tan a ni ta mai a, mipui lam kan inring thathum hman lo a, tam tak chu an chiai a niin a lang bawk a ni.

Tuna bawlhhlawh thliar dan hi tihdang lam dawrh a ni a, tawih thei anga ngaih thin te kha tawih thei huangah dahluh a rem tawh lo a. Plastic huanga awm tur ni awma ngaih te chu e-waste ah te telh a ni leh bawk si a. Thliar ngai chi hrang hrang a tam ta lutuk a hriat sen chi pawh a ni mai lo a. Hetih lai hian a khawntute lamin khauh takin an kenkawh nghal avangin a dawhna hmun thenkhatah bawlhhlawh te chu hai nghal te a lo ngai a, a thenah hnutchhiah an ni a, hmun thenkhatah chuan tenawm leh tawp a siam belh zawk a ni.

Bawhhlawlh paih buaipuitu AMC thil tum hi thil tha tak a nih rualin mipui kan thuhmun fo loh avangin inzirtirna lam hi nasa zawka uar a ngai viau dawn tih a lang reng tawh a, inhrilh tam luat a awm loa, an dawhtheih pawh a tul khawp ang.