ZALEN September 28, 2024 : Hindu pawl pakhat, Shankaracharya of Jyotirmath Peeth ten North East State hrang hrang leh Mizoram-ah Bawng talh lo tura beihpui thlak tuma rawn kalte chu Lengpui Airport an rawn tum hnuah Mizo Zirlai Pawl (MZP) General Headquarters hmalakna-in an thlawk let leh nghal.

Nimin khan he pawlte hi Mizoram lo kal tumin, Private thlawhna hmangin Lengpui Airport an lo tum a. Zirlai pawlten an duh lohna thuchhuah an lo siam avang leh, MZP te hian an dodal dawn tih an hriat avangin an thlawk let leh a ni.

MZP chuan, "Hnam dang pawl thenkhatin, Mizoram chhungah bawng talh lo tura mipui hrilhhriatna beihpui thlak an tum hiengti kawng mahin a pawm ngai dawn lova. Hetianga hnam dang pawl thenkhatin, Hnam nunphung khawih thei thil inzirtirna rawn neih an tum hi MZP chuan nakin zel atan a him a ring lova. An chet vel dan uluk takin a chhui zui zel dawn a. Mizo mipuite pawh hetiang hmalakna lakah fimkhur a, lo bengkhawn lo turin a ngen nghal a ni," an ti.

Mizo Hnam hnam nunphung leh tualzal nun khawih thei thila mipui zirtirna hi, eng pawl mahin neih rawn tum tawh lo se MZP chuan an duh a, an ngen nawn leh a ni.

Shankaracharya Pawlte hmalakna hi, MZP-in NESO-a a thawhpui pawl, North East-a zirlai pawl hrang hrang; Khasi Students' Union leh All Arunachal Pradesh Students' Union te pawhin an dodâl a ni.