Bayern Munich chuan a vawi hnih nan Sadio Mane chu lei tumin Liverpool an dawr a, Reds lam hian an dilna chu an hnawl nawn. An offer tharah hian a man pui £30million bakah add-ons-ah £6.5million an telh chungin Liverpool lam hian an pawm thei rih lo. An adds-on pek theih dan tur a an ziah chu beiseibo niah an ngai. 

Reds hian Mane, kum 30 mi man hi an chhiar to ang reng hle a, nakum June thlaa Anfield lama contract zo tawh mai tur Mane-a manah hian €50million bawr an beisei. Hemi hma hian Bayern lamin an dawr hmasakna £21million leh £4million add-ons chu an lo hnawl tawh bawk. 

Kar hmasa khan Mane hian, a hma hun tur ngaihtuahin an ram Senegal mipuite duh dan anga awm a duh thu a lo sawi chhuak tawh a, fiamthu titak-in Ligue 1 club Marseille a zawm thut theih thu a sawi bawk.

Mane leh a forward partner Mo Salah te hian nakum nipui thleng chiah Anfield-ah contract an nei tawh a, tun transfer hun chhunga an hralh chhuak lo a nih chuan, nakum lamah Mane hi free agent-a an chhuah leh tho a ngai ang. Bayern lam hian African Cup of Nations champion hi kum thum daih contract an lo zawrh ve thung. 

Champions League final hma khan, Sky Sports News hnenah a hma hun tur chu Real Madrid nen an inhmachhawn zawhah a sawi chian tur thu a sawi a, final-a an chak loh hnu lawkah Liverpool chhuahsan a duh thu a sawi nghal bawk a nih kha.

Mane chuan,"Social media-ah lutin ka chungchang comment te ka chhiar thin a, Senegal mipui 60 atanga 70 per cent zet chuan Liverpool chhuahsan turin min duh a, chuvangin an duh ang awm ngei pawh ka tum a ni. Thu tlukna chu a awm thuaiin ka ring a, mahse hmanhmawh lutuk erawh a ngai hran lovin ka hria," a ti.