Liverpool lam chuan Sadio Mane man tura Bayern Munich thehchhuah £21million chu an hnawl. A thiamna phu tawka hlawh hmu lova inngai Senegalese forward hian tun nipui chhung ngei hian Anfield chhuahsan a duh. Mane hian kum khat daih contract a la nei chungin Bundesliga champions Bayern chuan Mane lak tumin an bei mek. 

Times tarlan danin German club lamin forward an ngamna zat £21million chu Liverpool lam hian an la pawm thei rih lo va, he offer hi kar liam ta khan an siam nia hriat a ni, an ngamna zat an tarlan bakah hian Bayern hi Champions League lama a champion pui thei a nih chuan £4m dang pek belh an inhuam bawk. 

Mahse, Liverpool lam chuan an forward hi hetiang zat man lek a nih loh thu an sawi chiang tawh a, an hralh phalna zat pawh an tichiang thei rih lo. Jurgen Klopp-a te pawh hian Mane thlakna tur chu an melh ru ve reng tawh a, Benfica striker Darwin Nunez chuan an mit a la hle a, mahse lei tuma hmalakna lian tham erawh a la awm rih lo nia report a ni.

Afrcia Cup of Nations champion Mane chuan, Senegal mipui 70% velin Liverpool hi chhuahsan tura an duh thu a sawi. Kum 30 mi hian hmasawn zela hat-trick te siama an ram tana goal thun tam ber record siam a duh thu fiamthu titak deuhin a sawi lang. 

Bayern lam hian Mane hi Robert Lewandowski thlawp turin an duh tih an sawi a, chutih laiin an star player Lewandowski hian  Barcelona lam pan a tum ruh ve hle thung. Paris Saint-Germain lam pawhin Mane hi lei an hreh lo tih an lantir tawh naa amah Mane erawh chuan southern Germany lama khelh hi a chak deuh zawk niin sawi a ni.

Mane hian kum 2016 khan Southampton atangin £34million-in Liverpool hi a zawm a, Mane hi Liverpool hlawhtlinna tura thawhlawk ber pakhat niin game 269 a khelh tawhah goal 120 thunin assist 48 neiin Premier League, Champions League, Club World Cup, Super Cup, Carabao Cup leh FA Cup te a chawi vek tawh bawk. 

Heti chung hian Sadio Mane hian kar khatah £100,000 a hlawh mek a, player dang hlawh ngaihtuahin Liverpool forward hian level pui phak lovah inngaiin a hlawh hi tlem a ti deuh a nih hmel. Reds lama player pawimawh dang Virgil van Dijk leh Mohamed Salah te hlawh chanve bak a hlawh phak lo hian chhuah duhna rilru lian tak a siam ngeiin a rinawm. United player Alex Oxlade-Chamberlain te takngial pawhin kar khatah £125,000 a hlawh a ni a, Mane tan chuan lungawi a har ve viau maithei.