Ribery hian nikum September thla khan Salernitana hi a zawm a, mahse fitness lama harsatna a neih avangin 2021-22 chhung khan league game 17 chiah a khel. Tun season-ah pawh top flight match-ah chuan tum khat chiah a la inlan. 

Kum 39 mi chuan a hun tawp a thleng tawha a hriat thu leh football a chawlhsan thu hi Twitter kal tlangin a sawi a,"Mual chhungah hun ropui tak ka hman avang khan mi zawng zawng chungah lawmthu ka sawi a ni," a ti. 

Ribery hi Germany lama a khelh chhung kha a vanglai ber a ni a, Bayern tana a khelh chhungin Bundesliga vawi 9 a chawi hman a ni. 

Kum 2013 khan German club tan Champions League a chawi bawk a, final-ah Borussia Dortmund an hneh.

A hun pumpuiah club tan match 425 a khel hman a, kum 2007 leh 2019 inkar khan goal 124 a khung. Ribery hian a career chhungah club pariat a zawm hman.

French club US Boulogne-ah bul tanin Stade Brest leh Metz tan a khel leh a, hemi hnu hian Turkey-ah Galatasaray a zawm leh. France lamah kir lehin Marseille a zawm a, he hmunah hian club lian mit la khawpa khelin kum 2007 khan Bayern-in an lalut. 

Bayern lama a khelh lai hian kum 2013 khan Ballon d'Or dawng theih pathum thlan chhuah zingah telin a chungah Lionel Messi leh Cristiano Ronaldo te pahnih chiah an awm. 

Kum 2019 khan Bayern a chhuahsan a, Fiorentina a zawm hnuah Salernitana a zawm leh a, he hmunah hian a football zinkawng chu a hmang zo ta a ni.

Ribery hian France tan match 81 a khel hman a, tournament lian pali-ah ram tan a khel tawh bawk. Kum 2006 World Cup finalist squad-ah a tel. 

Chawimawina a dawn tawhte:

🏆 x1 Champions League
🏆 x1 UEFA Super Cup
🏆 x1 club World Cup
🏆 x9 Bundesliga
🏆 x6 DFB Pokal
🏆 x5 DFL SuperCup
🏆 x1 DFL Ligapokal
🏆 x1 Turkish Cup
🏆 x2 UEFA Team of the year