Aizawl: Tunlai hian Krismas bazar vangin Aizawl New Market chu a lun leh tawh hle a, Trade & Commerce thawktute chuan bazar a kal turte chu fimkhur se an duh tih an sawi a. Kumin chhung ringawta pawisa bo an chhinchhiah chu Rs. 2,88,160 a tling tawh niin an sawi. Zalen palaiin Aizawl New Market enkawltu Trade & Commerce dept. thawktute a kawmnaah New market thawktute chuan Krismas bazar, mi tam lai chuhin mi sual thenkhat chetna a awm theih thin avangin bazara kalte chu fimkhur se an duh tih an sawi a. A tlangpuiin thil tibo thin chu thingtlang lam atanga rawn bazar te an ni tiin heng mite hi hnung lama bag dah thin te an nih tlangpui avangin hma lama bag/pawisa ak thin turin an duh tih an sawi bawk. New market thawktute chuan an area huamchhungah chuan khauh takin kawngsir leh mipui chetvelna hmuna inzawrh an phal lo tih sawiin hetianga inzuar an hmuh te chu an man zel niin an sawi bawk. New Market enkawltute chhinchhiah danin kumin January atanga khan pawisa bo an hnena inreport chu Rs. 2,88,160 a tling tawh tih sawiin heng zinga hmuhlet chu Rs. 30,040 chauh a ni tih an sawi a. Tuna an chhinchhiah chu an area huam chhunga mi vek a ni lo nia sawiin an area pawna mite pawh an hnena report chu an chhinchhiah zel avangin bo report hi a tam phah niin an sawi bawk. New Market thawktute chuan an office-ah bo report a tam ang huin chhar report a tlem hle niin an sawi a. Tunah hian document pawimawh tak tak Voters ID, Aadhaar card, driving license, ATM card bakah chabi pawh thahnem tak an kawl tih sawiin hetiang tibo chuan ngaihsak se an duh tih Zalen an hrilh bawk.