Aizawl; Krismas leh Kumthar vuakvetah mi ipte atanga pawisa ruk thiam an che lem lo niin kan thudawnna chuan a tarlang a, pawisa/ bungrua tihbo a tam ang bawkin a chhartu/pelettu an tam niin New Market thuneitute chuan ZALEN an hrilh a. Hetih lai hian internet lamah Aizawl khawpui chu pick pocket tamna hmun a nih thu tarlan a ni bawk. "Chanchinbu lamah pawh fimkhur turin kan inchah nasa a, hei hian mipui a ti fimkhur a, pawisa ip inruksak report a tlahniam a, rukru te hian kan hmel an hriat avangin vil loh lamah an che ve hman thin," tiin Zothanmawia, Market Checker (MC) zing ami chuan ZALEN a hrilh a. January - Decemeber 2014 chhunga pawisa bo zat chu Nuai 10 dawn niin Krismas laiin Nuai 1.7 a bo bawk a. Kum hmasa lamah Nuai 8 vel a bo a, a bo hmulet pawh a pung niin MO chuan a sawi bawk. Pawisa chhar New Market office a report lut chu Rs. 27,118 niin kir let Rs. 21,618 a ni a. Pawisa tibo hmuh leh aiin pawisa chhar hmulet hi a sang zawk a ni.Thil bote hi lam hun chhung siam a ni a, lam loh chuan a chhartu pek a ni a, a chhartuin a lak loh chuan Market office chuan an kawl mai thin a. ZALEN zawhna chhangin chung pawisa chu hmanna ruahman fel a awm lo a, a awm theih nan hma an la dawn niin MC chuan a sawi. Mi ipte atanga pawisa ru thiam (pick pocket) te hi en mai chuan hriat hran an har a, 70% lai chu hmeichhia nia ngaih an ni. "Nu nau pua, nula inchei pangngai an ni tlangpui a, mipa an tlem zawk a ni. A chang chuan maltlat loin mi 2/3 te an inkawp a, pakhatin a biakbuai laiin a dang an lo che thin a. Kawnga mi kallai chu su luiin remchang an la thin bawk. Ipte zai thler thiam te chu mipa an ni deuh zel a ni," tiin police pakhat chuan ZALEN a hrilh a. New Market a thawkte erawh chuan pick pocket te chu an hmel an hre bel tawh niin an sawi thung. "CCTV hi a dah loh theih loh tunah chuan, thil ruka eizawng an tam tawh a. CCTV hian vanduai pawhin police hnuchhui a ti awlsam a, tlereuh leh hmeichhe inhnawih dawrah dah a ngai zual a. CCTV hi chu uar zel chi a ni, " tiin Zion street a dawr neitu pakhat chuan a sawi bawk.