Zanin dar 8 khan Mizoram Super League, season 7-ah Tuikual South BC leh Zatkawt BCA te intumin, Tuikual South-in 89-68 zetin hnehna an chang a, semi final lut turin dinhmun an siam tha chho zel. An foreign player Darrell Bowie a che tha hle a, point 45 zet a thun.

Supporter nei tha veng, Tuikual South tan an foreign player Darrell Bowie chuan point 45 zet thawk chhuakin rebound 16 a lak bakah assist 7 neiin block 2 a nei bawk. Amah thlawptu F. Zodinthara'n point 16 a thun ve a, Lalfakzuala'n point 11 a score ve bawk. Zarkawt BCA tan an foreign player Joseph Frederick Allen bawk chetha lehin point 29 thunin rebound 15 a nei a, BCA tan hian Aaron Varghese Blessen-a'n point 8 leh Lalrina Renthlei ten point 8 an thawk chhuak ve bawk.

Inkhelh tan phat atangin team pahnihte an inhnehtawkin game a hmuhnawm nghal. An chak loh leh chuan dinhmun hlauhawm a ding thei tawh Tuikual South lamin chak ngei tumin thei tawp an chhuah tih a hriat a, Champion lai BCA lam pawh an inthahdah bik lo tih a hriat.  Point 19-17 a Tuikual South lamin hma an hruai laiin first quarter a tawp. 

Second quarter-ah team hnih ten quarter hmasa aiin point an score thei deuh zawk a, point inhnaih takin 21-23 in Zarkawt BCA lamin quarter an la ve thung. Tun tournament-a hneh loh la tawng lo BCA lam hi third quarter-ah hian an inthlah dul deuh niin a hriat a, point an score hlei thei tlat lo. 3rd quarter a zawh meuh chuan Tuikual South nen point 18 zetin an inthlau hman a, Tuikual lamin point 29 an thun theih laiin Zarkawt BCA lam hian point 11 chiah an thun a ni. 

Point 18 zeta inthlauin fourth quarter tan a ni. Zarkawt BCA lamin insiam that tum ngial mah se an insiamtha hlei thei tlat lo, Tuikual South fans leh player lam an phur tulh tulh thung. Quarter hnuhnung berah pawh hi Tuikual South lam bawkin la lehin 20-17 a sang zawkin hun a tawp.

                   Total  Period 1  Period 2  Period 3  Period 4
Tuikual South  89     19           21           29           20
Zarkawt BCA   68     17           23           11           17         

Tuikual South BC
Darrell Bowie - 45 pts - 16 rebounds - 7 assist - 2 steals - 2 blocks.
F. Zodinthara - 16 pts - 5 rebound - 1 assist - 1 steal.
Lalfakzuala - 11 pts - 2 rebound - 1 assists - 4 steals

Zarkawt BCA
Joseph Frederick Allen - 29 pts - 15 rebounds - 1 assist.
Aaron Varghese Blessen - 8 pts - 8 rebounds - 1 steal.
Lalrina Renthlei - 8 pts - 5 rebounds - 2 assists - 1 steal.