ZALEN, Feb. 27, 2025: July thlaa Prime Minister Narendra Modi-a’n a hawn tura ruahman, Suaka Cricket Ground-a indoor training facility chu Ningani khan Board of Control for Cricket in India (BCCI) Councillor Mamon Majumdar-a hovin Mizorama cricket hotuten an tlawh.

Mizoramin cricket khelmual a neih chhun, Sihhmuia mi thuam chak hna hi chi hniha thawh niin Rs. Vaibelchhe 50 dawn senna tura ruahman a ni a, nakumah chuan a pahnih hi peih hman vek tum a ni.

Indoor training facility bik hi chhawng hnih tur niin a hnuai zawkah office, gymnasium, open shower leh swimming pool a awm ang a. A chungah indoor practice pitch awm tura ruahman a ni bawk.

Hna hi June thlaah zawh hman tura ruahman niin July-ah prime prime minister-in a hawn beisei a ni.

Hna thawh mek dang, club house/pavillion siam mekah hian inkhel thlengtu (home team) leh a tlawhtu (away team) tan dressing room awmin reception, physiotherapy room, first aid room, media room, umpire room, VIP room, office, kitchen, dining hall bakah boruak thununna khawl (air conditioner) dah vekna tur pindan 37 a awm ang.

Inkhai chhuk chhohna pahnih awm tura ruahman a ni bawk a. A chhawng hnuai ber (ground flooor) bakah chhawng thum dang awm tura ruahman a ni.

Majumdar-a hova Cricket Association of Mizoram (CAM) Apex Board Council member ten an tlawh pakhat zawk, club house-a hna thawh mek hi January, 2026-a zawh hman tura ruahman a ni ve thung.

CAM hian an khelmual neih chhun tihchangtlun nan hian anmahni pualin Rs. vbc 31.5 senna tur bakah India-a cricket thuneitu, BCCI atanga sum hmuh Rs. Vbc 18 hmangin heng hna hi an thawk mek a, zawh hun tura ruahmana zawh ngei an tum bawk.

Suaka Cricket Ground hi a hmun petu, Lal Rotluanga pa hming chawia a hming hi phuah a ni a. Kum 2010 khan a sakna tur lung phum niin DoNER ministry atanga sum hmuh, Rs Vbc 11 hmanga bul tan a ni a, inkhelh theihna peih a nih hnuah May 23, 2014 khan CAM kuta hlan niin tun thlengin a tihchangtlun hna hi thawh niin hma a sawn zel.

Tun season (2024-25) kal mekah pawh hian CAM chuan Sihhmuia khelmual thuam thar zelna atan Rs. Vbc 17.5 a ruahman leh bawk a. Hei hi November thlaa an pawl rorelna sang ber, Annual General Meeting (AGM) vawi 6-na chuan an budget atan Rs Vbc 30 an pawmah an dah tel a ni.