Aizawl: Central YMA President Lalbiakzuala chuan Dr. BD Chakma chu NGO Coordination Committee ten bâng tura huntiam an neih August ni 25,2017 thlenga a bang lo a nih chuan na zawka hmalak an tum tih a sawi. Nimina Mizoram huntawng leh hmathlir chungchang sawihona, Hnam Chhantu Pawl office-a neihah he thu hi sawiin Central YMA President chuan Dr. BD Chakma chu Chakma anih vang hrim hrima bang tura nawr an ni lo tih a sawi a. “India danpui hnuaia thutiam la siin midangte fuihpawrh zawnga hma lain anti-National-a a chet vangin bang turin kan phut a ni,” a ti. Citizenship Amendment Bill chung-chang sawiin Lalbiakzuala chuan, “Nikum September-a pharh tawh si, Mizoram Lok Sabha MP-in min hrilh lo leh kan hre har lutuk hi mak ka ti hle,” tiin a sawi bawk.