English player zingah Real Madrid tana khel hi an la tam lo hle a, David Beckham leh Jonathan Woodgate ten an chhuahsan hnuah phei chuan tun thlengin khel an la awm leh lo.

Woodgate phei hi chu season thum chhung zet an player ni mah se hliamin a tihbuai tluan deuh vek avangin vawi 14 emaw chauh khelmualah a lut a. English player zinga khel hnuhnung ber chu Beckham hi a tih ngam.

Tunah hian Jude Bellingham-a chuan a khel ve leh dawn ngeiin a lang ta a, indawrna thui tak an kalpui tawh a, sap ram chanchinbute phei chuan a jersey hak tur number thlengin an lo inrinsiak leh tawh.

Kum 19 mi chauh, Bellingham-a hian July, 2020 khan Birmingham City atangin Borussia Dortmund a zawm a. Nikum kum tawpa World Cup-ah khan England tana khel tha ber zinga mi niin club liante awh rawn a ni mek.

Real Madrid hian a manah Euro maktaduai 100 vel pek an inhuam nia sawi a ni a, Dortmund erawh chuan maktaduai 150 tal an duh nia sawi a ni bawk.

World Cup-a a khelh that hma pawha Europe-a club hrawl tak takin rawlthar duhawm a nih avanga an thlithlai nasat tawh, Bellingham-a man leh mualah hian inremna pumhlum la nei lovin Manchester City-in hêl ve reng mah se Los Blancos hian lak luh theih ngei an inring a, Dortmund-in contract thar an zawrh a hnawl tawh bawk.

Tun kar tawpah hian a pa leh chief scout Juni Calafat te an indawr dawn niin sap ram chanchinbute chuan an ziak hlawm.

Santiago Bernabeu club-in a hming sign la nei lo mah se chanchinbute chuan jersey number a hak tur chu an chaw tui a ni leh der tawh a. Dortmund-ah hian No. 22 a ha mek.

Kum 16 chauh nia Birmingham City tana a inlan atang tawh khan club-ah chuan No. 22 hlir a la ha.

England tana kum bithliah hrang hranga a inlan tawhah erawh a thlak ve sek a. A duh ber No. 22 a hak tawh bakah No. 7, 8, 10, 18, 19, 21, 23 leh 26 a lo ha tawh thin.

Real Madrid-a number hrang hrang hatute an han chhut neuh neuhvin a duh ber number hi Antonio Rudiger-a’n a ha mek a, German defender hian a kian a nih ngawt loh chuan a ha thei dawn lo niin a lang.

No. 7 chu Eden Hazard-a’n a chang mek a, No. 8 lah an rinrawl ber, Toni Kroos-a’n a ha vung a. No. 18 chu Aurelien Tchouameni, No. 21 chu Rodrygo leh No. 23 chu Ferland Mendy-a ten an ha hlawm.

A hak tawh thin number zinga a chuang la awm chhun, No. 26 chu La Liga-in senior player-te zingah hatu an awm a phal lo va, No. 1 leh 25 inkar chauh a hak theih turin kaihhruaina an siam bawk si.

Heti a nih avang hian Bellingham-a hak theih hnaivai ber chu No. 10 niin sap chanchinbu thenkhat chuan an ngai a. Luka Modric-a a hak mek a ni a, ani hi tun nipui thleng chauh Madrid khawpuia hun nei tawh a ni a, ziah belh lam sawi rik a la awm lem lo va. A chhuak a nih chuan a number hi a awl hmel riau.

No. 10 em phu lo leh ha duh lo a nih chuan Bellingham tan duhthlan tur dang pahnih, No. 14 leh 25 a la awm dawn niin an ngai bawk.

Sapho hi chu Mizoten ‘over’ kan tih ang deuh chi hi an ni ve a, an tih lam hi chu an sawi vak zel a. Tunah pawh an sawi thui viau tawh na a, a tak takah chuan Real Madrid hian English midfielder hi an la lut lo va, ‘teuh erawh a teuh tawh thawkhat’ viau niin a lang mai chauh a la ni.

Bellingham-a hian tun season-ah German club tan vawi 40 khel tawhin goal 11 a thun tawh a, mi dangte thun tur vawi sarih a siamsak tawh bawk.