Football star David Beckham chuan Australian fitness company F45 Training chu $mtd 20 zet chawi turin a khing hem mai. Beckham chuan promotional agreement an ziah angin F45 Training hian pawisa an pe lo tih a sawi a, sum thahnem tak chawi turin a khing ta a ni. 

Khawvela footballer lar ber zinga mi David Beckham hian footbal a khelh lai pawhin khelmual pawn atangin sum a lalut hnem hle a, a chawlh hnuah pawh a danglam chuang lo. Company hrang hrangte chuan intihlar nan fakna atan sum tam tak sengin an ruai thin a, F45 traing pawh hian kum 2021 khan inremna an ziahpui.  

An inremna hi cheng maktaduai eng emaw zat hu a ni a, company lam hian Beckham-a image right pawh an nei thlap. Mahse company lamin pawisa an pek tur zat hi Beckham hian a dawng lo a, court-a chinfel turin a thlen ta a ni. He company-ah hian American actor Mark Wahlberg pawhin share a nei nghe nghe. 

David Beckham bakah hian golfer Greg Norman pawhin F45 Training hi a khing ve mek bawk a, an company hi sum leh pai lamah an hmingchhe chho hle a ni. An company tih lar nan hian milar eng emaw zat an thawhpui a, sum leh pai an seng hnemin lar pawh an lar chak fu. Mahse tunah chuan pawisa tam tak chawi tura khinna an dawng leh ta si a, company hian an hmingchhiat phah viauin a rinawm.