ZALEN August 19, 2026: Chief Minister Lalduhoma hovin vawiin khan a pisaah Mizoram Liquor (Prohibition) Amendment Act, 2025 hnuaia Local Fruit Beer manufacturer leh Winery licence pekchhuah tur thlangtu tura din Selection Committee-te an thukhawm a, dilna 99 lut zingah Selection Committee-in a endik tawh mi/firm 11 pawm an ni. Meeting hi Excise & Narcotics Department Minister Lalnghinglova Hmar chuan a telpui.

Local fruit beer siam dil hi mi 96 leh Winery din dil mi pathum an awm a. Selection Committee chuan diltute tan interview a buatsaih bakah a a theih ang angin a hmunhma an endik a. Endikna behchhana Selection Committee in rawtna a siam atangin vawiina meeting chuan local fruit beer siam dilna 11 a pawm a, dilna dang 13 te chu hun pek belh a, endik leh phawt nise, an ti.

He hunah hian an hmalak lehzel dan tur leh an mamawhte an sawi nghal a. Selection process zawhah thlanchhuahte chu training neih pui a, kuthnathawktute nena inzawmna thuk zawk siamsak a, intlawhpawhtawnna (Inter-visit) an neih theih dan turte pawh an sawi a. Licence hmututen an zawm tur Standard Operating Procedure (SOP) mumal tak duan ni se an tih bakah application thehlut duhte tan hun hawn belh an rel bawk.

Selection Committee-ah hian Commerce & Industries, Excise and Narcotics Department, Horticulture Department, Food & Drugs Administration aiawhte bakah Mizoram University leh mimal he mi kawnga thiamna bîk neite an tel a, Handholding CEO a tel bawk.