ZALEN November 6, 2024 : MPCC President Lal Thanzara chuan, "Sinlung Hills Council inthlanna 2024 chu tluang takin kan nei zo ta a, kan beisei ang result nei pha lo mah ila, Congress party-in hmasawnna nasa tak kan neia a lawmawm takzet a ni," a ti.

Lal Thanzara chuan hnehna an channa Khawlian Constituency a voters te chungah an Candidate Lalrawngbawla an lo thlan tlin avangin lawmthu a sawi a, opposition bial ni dawn mah se, an thlahthlam dawn lo a ni tih lo hria se a duh tih a sawi.

Congress President chuan an tan chak a huphurhawm thu sawiin, "Kan hriat angin SHC bial 12 zinga bial 8 zette hi MNF MLA nilai bial a ni a. A bak bial 4 hi ruling party ZPM MLA nilai bial a ni bawk. ZPM leh HPC thawk dunin MNF leh HPC (R) an thawkho a. Hetiang karah thawhpui nei lova Congress kan mal din chunga bial hrang hranga Congress candidate te vote hmuh 2023 MLA election aia hmasawnna nasa tak lo lang hi a lawmawm hle."

"He inthlanah hian Congress chuan seat 1 chauh la mah ila, kan vote share a hniam lo hle a, bial thumah pahnihna kan nih bakah vote tlemte in kan tla a. Hei hian hma kan sawnzia a tarlang a ni," a ti.

Lal Thanzara chuan, "Kan party candidate zawng zawngte hnenah lawmthu ka sawi bawk a, Congress unit, group, VC, block leh Hqrs. atanga thahnemngai taka thawktute, party tana theihtawp chhuaha ke-in penna ah lawmthu ka sawi a, in taihmakna nakin atan a thlawn lovang tih ka ring tlat a, he inthlan hi kan party Congress chak zual zel nana rahbi pawimawh tak a ni zawk dawn a ni," a ti.

"SHC MNF sawrkar thar tur ka lawmpui a. Duhsakna ka hlan bawk a. Official mite inthlan buaipuitute chungah lawmthu ka sawi," a ti bawk.