Ningani atanga Uttar Pradesh khawpui, Lucknow-a khelh tan tur, 6th MMA India Senior National Mixed Martial Arts Championship-a tel turin Mizoram State MMA Association (MISMA) chuan fighter pariat a tir a, beiseina sang tak nen Thawhlehni khan Aizawl an chhuahsan.

Mizoram fighter-te hi MISMA hnuaia club pahnih, SPES Gym/Dawrpui Contact Sports leh HBK Gym-ah ngawrh takin inbuatsaihna an kalpui a. MISMA Technical Chairman Samuel Lalrozama, Dawrpui chuan tun tum inelnaah hian beiseina an nei sang a, nakuma professional MMA promotional company liana contract sign thei pahnih/thum tal an awm zui theih a beisei thu a sawi.

Samuel Lalrozama chuan a tam thei ang ber amateur event khelh a pawimawh thu leh hlawh zawk neia professional fighter-a zuan luh theihna kawng, mahni kea an din theihna kawng a nih thu a sawi bawk.

Inelna buaitsaihtu, MMA India chu khawvela amateur MMA federation lian ber, Internatoinal MMA Federation nena inthlunzawm a ni a, international medallist nih chuan professional company lian – EFC, Invicta FC, PFL, ONE, BRAVE, UFC leh a dangten contract ziahpui turin an sawm reng nia sawiin, “Mizo thalaite tan chance tha tak a awm,” a ti.

Pathianni thleng awh tur championship-a Mizoram aiawha kal turte hi senior category (kum 18 chung lam)-ah fighter paruk - Nazareth Lalthazuala, Zemabawk Kananthar veng; Zarmawia, Chite Veng; Lalnunmawia, Tlangnuam Vengthar; David Lalmalsawma, Kulikawn; Jonathan Lalduatliana, Falkland leh Lalmuanpuia, Sihphir te an ni.

Under 21 years category (kum 18-21 inkar)-a khel turin Israel lalrinawma, Hunthar veng leh Malsawmthanga, Thuampui an kal bawk.

Mizoram aiawha chhuakte hi an training chhung hian international fighter hmeichhe pahnih – Vridhi Kumari, Tamil Nadu leh Khushboo Nishad, UttarPradesh te chuan SPES Gym-ah national training camp zawm tura inbuatsaih nan thla hnih dawn an chamchilh ve nghe nghe.

MISMA President Jeremy Pautu chuan Chief Minister Zoramthanga’n fighter-te a mi mal leh sorkarin a sponsor theih nana hma a laksak avang leh Sports Minister Robert Romawia Royte-in fitness test a tihsak avangin amah leh a department enkawla thawkte chungah lawmthu a sawi.