Aizawl; Bekang eisual vangin Bungtlang South-ah mi engemawzat damlo mek a, damdawi In lamah thenkhat chu enkawl an ni. He an bekang ei sual hi kar hmasa Zirtawpni, May ni 9-a Bungtlang South Presbyterian Kohhran Hmeichhia ten sum tuak nan an zawrh a ni a, an bekang um hi Lunglei atanga an leichhawn niin sawi a ni. Heng damlo te hi Bungtlang South PHC-ah hruai an ni a, an zinga na zual mi 9 chu Lawngtlai Civil Hospital-ah refer an ni. Bungtlang PHC-ah hian mi 70 vel an lut a, khum a tam loh avangin mi engemawzat chu First Aid pek hnu-ah in lama enkawl zui an ni. Lawngtlai Civil Hospital-a awm Lalnunpuia, Bungtlang South khua chu pum lam chiang lo sa a nih avang leh a na a zual zel avangin Lunglei lamah refer a ni bawk. Bungtlang South khaw piah lawka awm Hmunnuam khuaa chhungkaw pakhat, Bungtlang South-a kal lawkte pawhin he bekang hi leiin, an chhungkua in damdawiin lamah kalpui an ni bawk. He Bekang eisual hi eng ang chiah nge a nih fiah turin forensic lamin an enfiah dawn nia thu dawn a ni.