Aizawl; Tunhnaia Bungtlang South leh Ramhlun venga mi tam tak bekang vanga an damloh chhan chu a sawngbawlna a thianghlim tawkloh vang nia rin a ni. Aizawl Civil Hospital a Department of Microbiology chuan mi tam tak damlohna chhan bekang an enfiahna ah heng bekang ah hian 'non luctose fermental bacteria' an hmu a, khawl an neih that tawkloh avangin hei aia chiang chuan an hre thei hrih lo a ni. Forensic Science Laboratory pawhin an endiknaah rannung thahna hlo nena sawngbawl ni lovin natna hrik a awm vang niin an sawi bawk. Aizawl Civil Hospital a Medical Superintendent Dr. Rosangluaia chuan tunhnaia mi thenkhatin an thihpui bekang chu rannung thahna hlo a sawngbawl lam aiin a umna a thianghlim tawkloh vang niah an ngai tih a sawi a. "Bekang umna hmanrua hrang hrang thianghlim tawkloh vang te, a buaipuitu kut fai tawkloh vang te, um zawh hnuah pawh a funna thianghlim loh vang leh an dahna hmun thianghlim tawkloh vang te in natna hrik hi a kai awlsam hle a ni," a ti. Dr. Rosangluaia chuan non luctose fermental bacteria chuan mihring kaw chhung a khawih pawi a, an thisen tihniamin vanduai chuan thihna a thlen mai thei niin a sawi bawk. Integrated Disease Surveilance Programme hotute pawhin tunhnaia bekang vanga mi engemaw zat an damloh chhan chu a siamna hmanrua thianghlim tawkloh vang nia an hriat thu an sawi bawk. Agriculture Director Dr. C. Lalzarliana chuan tunhnaia mi thenkhat damlohna chhan nia sawi bekang leh an department in loneitute hnena an sem chu a inanglo tih leh an sem chu a lian bik tih Zalen palai a hrilh bawk a ni.