Aizawl: Mizoram sawrkar chuan Below Poverty Line (BPL) awm lohna khua 5 te tan NEDP hnuaiah hmasawnna hnathawhna turin nuai 40 theuh tanpuina a ruahman. Mizorama BPL survey neih thinah a ram mipui cheng zinga 21% aia hniamlo BPL ni thin chu kum 2016 a baseline survey neiah 19.63% ah a tlahniam a. Hei mai ni lovin Champhai district chhunga khaw 5- Pamchung, Rabung, Tlangmawi, Chawngtlai leh Riangtlei khua te chu BPL awmlohna khua ah puan a ni. Chief Minister Lal Thanhawla hmalaknain heng BPL awm lohna khuate tan hian ‘Participatory Community Development Project for BPL free villages’ ruahman a ni a. He project hnuaiah hian NEDP kaltlangin cheng nuai 40 theuh ruahman sak an ni ang a, an khuaa VC te kaihhruaina in Village Development Committee dinin  VCP chu Chairman niin member ah YMA, MUP, MHIP leh khawtlanga parawn (prominent citizen) te ruat tura tih an ni. VDC hian khawtlang hmasawnna tur, eizawnna siamsak thei tur leh sum hnar siam tur project a ruahman ang. VDC te project ruahman enpui tur leh a tihhlawhtlinna atana tanpui turin DC kaihhruaina hnuaiah District Planning Committee, Champhai District ruat a ni bawk. He special projects hlawhtlinna tur hian Planning & Programme Implementation Department chuan a tul angin hma a laksak zel bawk dawn a ni.