ZALEN, November 30, 2025: Asmita Khelo India Women Youth, Junior leh Senior Weightlifting Championships East Zone neih zawh takah Mizoram atanga rit chawi chak kal pangate chuan medal an hawn vek a, a vaiin medal paruk an la.

Kolkata, West Bengal-a Ningani atanga inelna tan hi Pathianni khan zawh a ni a, Mizoram hmeichhe lifter-te hian youth-ah gold leh silver medal pakhat ve ve leh bronze pahnih an la a. Junior-ah silver pakhat leh senior-ah bronze pakhat an hawn bawk.

Youth-ah kg 53 huangah Mizoram State Sports Council (MSSC) Non-Residential Coaching (NRC)-a awm mek, Annie Lalruatfeli Colney, Bethlehem Veng, Aizawl tleirawlin Mizoram gold medal lak chhun awrhin snatch-ah kg 55 leh clean & jerk-ah kg 75, a vaiin kg 130 a chawi.

Keitum tleirawl, Khelo India State Centres of Excellence (KISCE)-a awm mek, Zosangzuali chuan medal pahnih laiin junior-a +86 kg huangah silver leh senior-ah bronze medal a la a. A vaiin kg 154 (snatch-ah kg 68 leh clean & jerk-ah kg 86) a chawi a ni.

Youth-ah kg 58 huangah Khawzawl Lungvar tleirawl, Pricilla Biakremmawi’n bronze medal a la a, snatch-ah kg 67 leh clean & jerk-ah kg 88, a vaiin kg 155 a chawi.

Kg 63 huangah Pricilla-i nena MSSC NRC-a awm, Champhai Ruantlang tleirawl, Lalrintluangi’n snatch-ah kg 60 leh clean & jerk-ah kg 83, a vaiin kg 143 chawiin bronze medal a la a. Champhai Ruantlang tleirawl tho, T.Lalhmangaihtluangi pawhin kg 48 huangah snatch-ag kg 46 leh clean & jerk-ah kg 60, a vaiin kg 106 chawiin silver medal a la bawk.

Asmita Khelo India Women League Weightlifting Championships East Zone-ah hian Mizoram atangin rit chawi chakte bakah anmahni hruaitu (official) pahnih, Zohmangaiha, MSSC coach leh Lalremruata, Manager, Dawrpui Vengthar, Aizawlte an kal a ni.