bengdar : BENGVARNA Ralf Rangnick

Admin - Nov 28, 2021

Russian club FC Lokomotiv Moscow-ah Head of Sports & Development a ni mek

England mai ni lo, khawvel football club ropui ber ang hiala mi tam takin an sawi, Manchester United-in an manager thar tur atana an seng luh tura an sawi, German coach Ralf Rangnick-a hi June 29, 1958-a  Backnang-a piang leh sei lian a ni a. A pa hi Dietrich niin a nu hi Erika Rangnick a ni thung a, kum 1945-ah intawngin a nu hi Breslau lam chhuak niin a pa hi Königsberg lam chhuak a ni thung.

Rangnick-a hi coach dangte ang bawka inkhel ve thin a ni a, VfB Stuttgart-a bul tanin a thiamna danglam tak avangin a khelh bakah coach atan an hmang zui a. A khel rei lo thung a, a khelh chhung hian Germany-ah hun a hmang ber a, English club Southwick-ah pawh University of Sussex-a a awm laiin a khel ve zawk tawh bawk.

Tunah hian Russian club FC Lokomotiv Moscow-ah Head of Sports & Development a ni mek.

A inkhelh ve lai atang tawha mi dangte enkawl leh hruai thiam a nih avangin Rangnick-a hi kum 25 lek a nih lai, kum 1985 khan coaching lamah a kal tan a. Kum 1997 khan a khelh tawhna thin, Ulm 1846 chuan an la lut a, Regionalliga Süd-a a season khatnaah a champion-pui nghal a ni.

Bundesliga club VfB Stuttgart chuan an la lut zui a, UEFA Intertoto Cup-ah kum 2000 khan champion-pui zui lehin a dawt leh season-ah erawh a chet thatpui tawk loh avangin bân a ni thung a. Kum 2001 khan Hannover 96 a zawm a, 2. Bundesliga-ah a champion-pui leh hman a; mahse, kum 2004 khan bân a ni leh bawk.

Schalke 04-a hun rei vak lo a hman leh hnuah Rangnick-a hi kum 2006 khan 1899 Hoffenheim chuan an la lut a, anni hi a chet thatpui hle a, season hnih chhung kaisanpui zawnin Bundesliga hial a thlenpui a; mahse, kum 2011 khan inthenin Schalke 04-ah a kir leh a. Hetah pawh hian che chhe lovin 2011 DFB-Pokal-ah a champion-pui a, UEFA Champions League-ah semi final a thlenpui bawk.

Kum 2012 khan Rangnick-a hian Red Bull zawmin Red Bull Salzburg leh RB Leipzig-ah director of football a ni kawp a. A hnuah heng team hnihah hian head coach a ni leh ve ve bawk.

Red Bull-a a awm chhung hian Rangnick-a hian European football-ah a inzar pharh zaupui nasa hle a, player hriat lar lem lohte chherin naupang zawkte pawh a tuaihriam nasa hle a. Red Bull club-te hi an hlutna pawh nasa taka tisangin € maktaduai 120 hu vel kha a hun chhung hian € tluklehdingawn 1.2 zetah a kaipui hman a ni.

Share now